Shabash Chanmari FC
Chanmari FC-in Malsawmfela an nei a, Mizoram Premier League inkhel pawimawhah champion lai Aizawl FC chu 1-0 in an hneh.
Thawhlehni zan inkhel result avangin Chanmari FC chu MPL hmahruaitu an ni a, tun season bikah Aizawl FC vawi hnih hneh tawhin tualchhung club zinga K. Malsawmkima hote hneh thei awm chhun an la ni.
Hun tawp lamah Chanma-rians-in an hla thul khung 'Shabash' tih Lammual-ah an sa rual leh ta a - MPL, I Day Football leh MFA Super Cup champion lai AFC an hneh meuh chuan Lammual nawmna an tem thar leh ta.
Sawmfela Vs Chullova
Chanmari FC chhuanvawr Malsawmfela'n vawi eng emaw zat Aizawl FC tlarhnung in-nghahna Lalramchullova a su tlang a, Ramhlun South tlangval Sawmfela hian Lalruatfela Zote leh Lalrammawia te hnen aṭanga puihna a hmuh ṭhat loh avangin AFC keeper Zothanmawia tan hna a siamsak thei meuh lo.
Minute riat chiah a awm tawh tihin Reuben Zosangpuia freekick chu Sawmfela'n a tlawh lut a, AFC keeper Zothanmawia a wall siam danah sawisel theih ni mah se Chanmari forward goal khung danah keeper dem theih a ni lo.
Striker 'class' Sawmfela'n khelmual chhungah a thiamna a lantir avangin inkhelh banah 'man of the match' hlan a ni.
Rohminga bawk a la thiam!
Chanmari FC-in Aizawl FC midfield dang chat turin player che rang Lalrinchhana, Fela Zote leh Lalrammawia te khelmual lai-ah an dah a, veteran midfielder Ro-hmingthanga'n par vul nan a hmang.
Aizawl FC captain Rohminga ball khawih apiang kut bensak tlak a ni a, Lengpui tlangval ball thiam vangin Fela Zote leh Rosanga'n ten yellow card an hmuh phah.
Rohminga hian second half minute thumnaah hla tak aṭangin crossbar a pet ber bawk a, Aizawl FC vanneih zan ni se goal ropui tak ni thei tur a ni.
Tlarhma bil!
Aizawl FC striker Bright Mid-dle-ton Mends-a'n goal chance
ṭha bik a nei hmasa ber a, goal zawnah pawh a pet lo. Durand Cup match nga khelha goal ruk khung thei Bright hi Lammualah Aizawl FC ênna a ni pha lo a, a kawppui William Lalnunfela'n hnai tak
aṭangin a hlah bawk.
Hun tawp lamah AFC-in na takin an si phurh sut tumin an nawr lêt a, substitute Lalremsanga ball petin Chanmari FC keeper MS Dawngliana pel thei mah se goalline
aṭangin midfielder Rinchhana'n a pet chhuak. Hei chauh hi a ni lo, Chanmari keeper man per chu defender Lalṭhakima'n a hlawi
ṭhelh bawk a, Aizawl FC-in an ui vawng vawng ang.
Chhum zinga imkhel
Aizawl FC-in second half ṭan
ṭha mah se minute 58-naah chhum zin vangin chawlh a ṭul a, darkar chanve hnuah inkhel chhunzawm leh chauh a ni.
Chawlh lailawk chhawrtu Chanmari coach Lalsangzuala Hmar-in ngaihtuahna fim hmang hmanin rawlthar Ṭhasiama aiah tawnhriat nei ṭha midfielder Reuben Zosangpuia a luhtir a, player chau zual an hahdam hman bawk avangin inkhel a danglam phah. Chakna goal luh theihna tura freekick pettu Reuben-a hian freekick aṭang thoin goal ban a pet per a, inkhel thlak danglamtu zingah a ngaih theih.
Tih tur ti lo Referee?
Aizawl FC coach Mala chuan, "Kan chak loh chhanah referee mawhpuh lo mah ila yellow card hmu tawh Fela Zote kha red card hmu tur a ni a, referee-in a tih tur a ti lo. Goal kan chhuah dan kha kan sawi ngun tawh a, kan la tisual fo hi chu a dik lo. Tlarhma lam chance hlah zozai kha ka sawifiah thiam lo bawk," tiin a lungawi loh thu Vanglaini palai a hrilh.
Fela Zote-in yellow card vawi hnihna a hmu loh chhanah referee-in zahngaihna a lantir nasa mah mah niin Aizawl FC lamin an ngai a; amaherawhchu Chanmari FC lam ngaihdanah Aizawl FC chungah pawh referee hian khawngaihna a lantir ve tho.
Chanmari FC manager Mawitea chuan, "Fela Zote kha chu referee thutlukna a ni a, red card em awm a la ti lo a ni ang. Ka hmuh dan chuan Rinzuala'n Muanzova laka mawi lo taka a chet avangin red card a hmu tur a ni," tiin referee lakah a lungawi bik lo.
Goal khat chauh lutin red card phawrh ni lo mah se goal chance a awm nual bakah penalty shout thlenga a awm avangin inkhel a hmuhnawm. Hei erawh hriat tel a ṭha, tun hi MPL5-a an vawi khat intawnna chauh a ni a, an la intawng leh dawn.
Tute nge inlan?
Chanmari FC (4-1-4-1) : MS Dawngliana; Thomas Lalengkima, Lalrinchhana, C. Lalrosanga, Ramfangzauva; Lalrinchhana; Ṭhasiama (Reuben Zosangpuia 58'), Lalrammawia, Lalruatfela Zote (Rosangliana 90+3'), Lalmuanzova; Malsawmfela.
Aizawl FC (4-3-3) : Zothanmawia; Lalrinzuala Khiangte, Lalṭhakima, Lalramchullova, Ricky Lallawmawma; Rohmingthanga, H. Lalbiakthanga (F. Lalremsanga 85'), B. Zoramthara (Lalnuntluanga 90+1'); Brandon VL Remdika, Bright Middleton Mends, William Lalnunfela (Rochharzela 68').
ZoFooty Statistics
Chanmari FC 1 - 0 Aizawl FC
CFC : Malsawmfela 81'
MoM : Malsawmfela, CFC
43% Ball Posession 57%
8 Shot(s) 16
3 On Target 5
3 Yellow Card(s) 3
0 Red Card(s) 0
Powered By Rainbow Multibrand
Mobile Showroom