Subroto Cup-ah Mizoram chak nghal

Champion lai Mizoram chuan nimin khan Subroto Cup Football Tournament U-14 a an match hmasa ber khelin Meghalaya 2-1 in an hneh.

Dr. Ambedkar Stadium, New Delhi-a inkhelah Mizoram tan hian Hmangaihsanga leh Lalsangpuia ten goal an khung. Kumin Mizoram team hi Govt. Kolasib Middle School hminga kal an ni. Pool C-ah awmin vawiin tlai dar 4:00 hian Uttar Pradesh an hmachhawn leh ang a, an league match dangah Navodaya nen an la inkhel leh bawk ang.

Nikum khan Govt. Chawngfiang Middle School, Kolasib chu Mizoram hmingin an lo kal tawh a, final-ah Afghanistan team Esteqalal School chu 3-2 a hnehin an lo champion tawh.

October thla hian U-17 inelna pawh neih a ni dawn a, Pool C-ah Mizoram, Sikkim, NCC, Car Nicobar, Indian Railways leh Bangladesh te an awm khawm. Kumin hian he inelna bikah hian team 48 an inlan dawn a, India ram pawn South Korea, Ukraine, Bangladesh leh Thailand aṭang tein team an rawn kal dawn.