Pep-a'n ngaihdam dil phut

Manchester City ma-nager Pep Guardiola chuan Yaya Toure agent Dimitri Seluk-a'n a thu lo sawi tawh chungchangah ngaihdam a dil a nih loh chuan Toure chu City tan a inlan tawh loh tur thu a sawi.

Kum 33-a upa Toure hi tun season-ah City tan match khat chiah a la khel a, Spanish manager hian Champions League khel tur player 25 a thlan chhuah zingah a hming pawh a telh lo.

Toure agent Seluk hian, "City tan Champions League nomawi a chawi a nih chuan TV hmaah Pep Guardiola hi khawvela coach ṭha ber a ni tiin ka sawi ang, a champion lo a nih erawh chuan player ṭha tak a tithangtlawm hleah ka ngai ang," tiin a lo sawi tawh.

Barcelona coach a nih laia City hnena Toure hralhtu Guardiola chuan, "Player ṭha tak a nih avangin Champions League squad a telh loh kha thutlukna harsa tak a ni. Amaherawhchu, coach ka nih avangin player
ṭhenkhat an khelh loh vanga media hmaa ṭawng chiam zel hi ka ngaithei lo," a ti.

Guardiola chuan sawi chhunzawmin, "Manger chuan hnathawh tur a nei a, player ten harsatna an nei a nih chuan club chhungah an sawi zawk tur a ni. A thiltihah khan ngaihdam a dil a nih loh chuan he club tan hian a khel tawh lo ang," tiin midang hriata harsatna puan chhuah vek a ṭul a tih loh thu a sawi.

Toure agent Seluk a ngawi bik lo, "Guardiola hian Manuel Pellegrini hnenah ngaihdam a dil a nih chuan kei pawhin a hnenah ngaihdam ka dil ve ang," tiin a sawi. Loan hmanga a chhuahtir Joe Hart lakah pawh Spanish manager hian ngaihdam a dil ngaia a hriat thu a sawi tel bawk - an boruak hi a la tawp mai dawn lo tih a chiang.

Hetihlai hian Toure chuan Ivory Coast tan inkhelh a chawlhsan thu a lo sawi ve bawk. Toure hian ram tan match 113 khelin kum 2015 khan Africa Cup of Nations-ah a champion pui.

Toure chuan, "Kum 14 zet ka lo chenchilh tawh ka tawp san tur thu sawi hi ka hringnuna hun harsa lai ber a ni hial ang," tiin a sawi.