Dijon hnehtu PSG-in hma hruai

French Ligue 1 champion Paris St-Germain-in duhthu-sama ṭhain bulṭan lo mah se an insiam ṭha leh tawh a, Thawhlehni zan khan Dijon 3-0 a hnehin point 13 an hmu a, league table-ah hmahruaitu an ni. Nizana AS Monaco inkhel result a zirin hmahruaitu hi a danglam lehnghal thei thung.

Unai Emery-a'n 'ṭha taka kan khelh chuan goal chu kan khung mai ang' tiin a lo sawi lawk tawh. A zawna vawi li Ligue 1 champion ni thei PSG hian Champions League-a Arsenal 1-1 a an hnehtawk hnuah Caen 6-0 in an sawp a, tunah goal thum dang an khung leh ta.

Parc des Princes-a inkhelah PSG tan Maxwell a langsar a, kum 35-a upa defender ball cross chu Adam Lang-a'n an lama a tih luh bakah Lucas goal khung tur a siamsak bawk. Caen laka goal li khung thei Edinson Cavani chuan penalty aṭangin goal khat a khung ve a, Uruguay international hian league match ruk an khelh aṭangin goal ruk a khung der tawh.

PSG manager Emery chuan, "Dijon khan an goal an ven uluk avangin inkhelh a harsa hle, goal hnih kan khung hnuah pawh a la awlsam chuang lo. Minute 67-naa 3-0 a nih hnuah erawh a ziaawm chauh," tiin an khingpui lakah nuamsa taka an chak bik loh thu a sawi.

PSG hian ball possesion 57% chang chungin goal khung tumin vawi riat an pet zinga pali chu goal zawnah a kal a, hetiang tho hian Dejon pawhin goal khung tuma ṭum riat petin vawi li goal zawnah a kal ve tho.