Valencia-in coach an ban

Valencia chuan La Liga match li an khelh tawh aṭanga table mawng-phaha awmpuitu coach Pako Ayestaran chu an ban thu an sawi.

Kum 53-a upa Ayes-taran hian March thla khan Gary Neville a hmunruak a luah a, a kaihhruaina hnuaiah Spanish club hi match 12 an khelh aṭangin vawi riat chu a chak lo zawkah an ṭang. Pathianni zana Athletic Bilbao 2-1 a an hneh loh kha a match hnuhnung ber a ni ta.

Ayestaran hi New-castle manager Rafael Benitez hnuaiah Valencia leh Liverpool-ah te assistant coach a lo ni tawh a, coach puitling a nih hnuah Valen-cia a chet chhiat pui hle.

Valencia hian 'Voro' tia hriat lar Salvador Gonzalez Marco chu an club hi an enkawl lailawk tir tura ngaih a ni, kum 2015-a Nuno Espirito Santo a ban pawh khan club defender hlui hian enkawl lailawk hna hi a lo thawk tawh.

Spanish club chuan thuchhuah siamin, "Club thuneitute inhmuh khawm hnuah Valencia Football Club chuan Pako Ayestaran hi a hna chawlhsan turin thu a ti tlu ta. Club tan puitling taka a hnathawh leh inpekna zawng zawngte avangin a chungah lawmthu kan sawi," an ti.

Valencia hian tun nipui transfer lai khan player pasarih ngawt an lalut a, heng zingah hian Manchester United winger hlui Nani leh loan hmanga Manchester City aṭanga an hawh Eliaquim Mangala te pawh an tel - heti chung hian league match li an khelh tawhah an chak lo fai vek! Anni chiah hi La Liga club 20 zinga point la hmu lo awmchhun an ni.