Lazio lakah Milan chungnung

Thawhlehni zan Serie A inkhelah AC Milan chuan an mikhual Lazio chu Carlos Bacca leh M'Baye Niang te goal khung hmangin 2-0 in an hneh. Vincenzo Montella naute hian match nga an khelh aṭanga point kua hmuin table-ah pathumna an luah rih.

San Siro-a inkhelah Milan-in inkhel an thunun a, kartawp inkhela Sampdoria an hneh ṭuma goal khungtu Sevilla forward hlui Bacca chuan minute 37-naah goal hmahruai a khung. Hun tawp dawnah Lazio defender Stefan Radu-a'n handball vanga penalty a chawi chu M'Baye Niang-a'n goal-ah a chntir bawk.

Milan goal hmahruai khungtu Colombian striker Bacca a parvul mek a, league match a khelh hnuhnung pariatah goal riat a khung tawh - heng zinga goal nga chu San Siro-a a khung a ni nghe nghe. Hetihlai hian chak lo zawk Lazio hian Serie A match hnuhnung parukah goal 12 zet an chhuah tawh.

Champions League nomawi vawi sarih chawi tawh Milan hian tun hnaiah beisei an phak lo a, tun ṭum hi kumin February thla hnua a zawna league match hnih hnehna an channa hmasa ber a ni - an in-siamṭha chhunzawm thei ang em tih chu chhanin a awm zel dawn.

Milan coach Montella chuan, "Bacca hian a khel ṭha tluang hle a, chutih rualin ropui taka a khelh chhuah theih nan a teammate ten an pui ṭha bawk. Ani kan chelh hi tun nipui transfer laia kan thil tih ṭha tak a ni. Lazio kan hneh theih nan kha chuan player zawng zawng an khel
ṭha vek a, min ti hlim hle," tiin a sawi.