Reds leh Arsenal chak nuamsa

Liverpool leh Arsenal-in EFL Cup fourth round lut turin harsatna an tawk lo - Reds hian khualmualah Championship club Derby County chu 3-0 in an sawp a, Nottingham Forest khelmualah Gunners chuan laipui vawi li zet hmet puakin 4-0 in hnehna an chang bawk.

Premier League-a ngam loh la tawng lo Everton EFL zinkawng erawh tihtawp sak nghal an ni a, Championship lama tla hlim Norwich lakah 2-0 in an tlawm. Preston North End chuan an mikhualna ramah Bournemouth 3-2 in an barakhaih a, Rafael Benitez-a enkawl Newcastle United chuan 2-0 in Wolves an hneh bawk.

Goal khung thiam Reds

Liverpool manager Jurgen Klopp-a'n Chelsea hneh hlim Reds starting XI aṭangin player pasarih lai siksawi mah se Derby khelmualah harsatna an tawh phah lo a, Ragnar Klavan-a'n Reds tana a goal hmasa ber a khung hnuah Philippe Coutinho-a'n Roberto Firmino nen an in one-two hnuah an goal hnihna khungin Divock Origi chuan an goal thumna a khung ve leh bawk.

Brazilian midfielder Coutin-ho a langsar fal a, goal khat a khung bakah Reds goal hnih dang hi a siamsak ve ve a ni. Reds hian tun season-ah match sarih khel tawhin goal 19 lai an khung tawh a, match li chhung chu goal thum aia tam an la khung ziah! Reds player 10 laiin tun season-ah goal an khung tawh.

Liverpool manager Jurgen Klopp chuan,"Team ṭha zawkin hnehna kan chang a, chak hi kan phu a ni. Tun aia ṭha zawka la khel thei kan ni a, mah se 3-0 a hnehna chan hi result chhia a ni ngai lo," tiin a naute khelh dana a lawm thu a sawi.

Hei le Lucas!

Arsenal striker thar Lucas Perez-a'n London club tana a goal hmasa ber khungin Nottingham lakah goal hnih a khung. Gunners tan midfielder Granit Xhaka chuan yard 30 vela hla aṭanga goal ropui khungin a team hi hma a hruaipui a, Spanish striker Lucas-a'n penalty aṭanga a chhunzawm hnuah a goal hnihna khung lehin Alex Oxlade-Chamberlain chuan injury time-ah an goal lina a khung ve leh bawk. Arsenal striker hlui Nicklas Bendtner-a'n a club hlui lakah hun ṭha nei mah se a chhawr thei lo.

Gunners boss Arsene Wenger chuan,"Lucas khan a khel ṭha takzet a, a che rangin a inringtawk em em bawk. A goal hnihna khung tura a technique dik zia leh thawhrimzia kha hmuh hmaih theih a ni lo a, Alex-a goal khung theihna tur khan a thawhhlawk em em bawk. Ka tana pawimawh ber erawh hnehna kan chang hi a ni," tiin hnehna an chan theih avanga a lawm thu a sawi.

Everton-ah Naismith a kir

Ronald Koeman-a'n Everton a enkawl hnua a vawi khat nan ngam loh a tawng a, Norwich lakah 2-0 in an tlawm. Goodison Park-a inkhelah Everton player hlui Steven Naismith a langsar hmasa ber a, Scottish forward hlui hian tawlhthlu chunga ball a pet chu a club hlui goal-ah a kum lut.

Mualneitu lamin vawi tam chhanletna hun nei mah se an hun ṭha neih an chhawr thei lo a, Enner Valencia ball pet goal line aṭanga Alex Pritchard lo pet chhuah hman te chu uiawm tak a ni. Norwich bawkin goal an khung chhunzawm a, Josh Murphy chuan ṭha taka Everton lama a khalh luh hnuah mawi takin a pet goal a, Toffees defender ten tih theih an nei lo.

Cherries an tlawm

Premier League-a 4-0 ngawta Manchester City hneh lo hlim Bournemouth-in EFL Cup lamah insiamṭhatna remchang nei mah se goal thum khungtu Simon Makienok an ngam lo a, Championship club Preston North End lakah 3-2 in an tlawm.

Denmark international Ma-kie-nok-a'n goal hmahruai a khung hnuah Cherries-in Lewis Grabban leh Dan Gosling hmangin chhanglet ve leh mah se kum 25-a upa striker hian goal hnih dang a khung leh a, an mikhualna ramah 3-2 in hnehna an chang.

Benitez-a kaihhruaina hnuaia insiamṭhat tum mek New-castle-in Wolves laka hnehna chang turin harsatna an tawk lo a, Scottish striker Matt Ritchie leh French forward Yoan Gouffran-a goal ropui hmangin Wolves chu 2-0 in an hneh.