Chhinga Veng nge lian Dinthar?
Dinthar FC-in tun hmaa an elpui ber Chanmari FC lak aṭangin point khat an hlawh chhuak tawh nachungin Mizoram Premier League champion hmasa ber hi tla tura rinkai an ni. An khingpui tur Chhinga Veng FC-in season bul ṭan ṭha mah se match thum khelh zawhah an hawi lam a dang leh tawh.
Zanin dar 7:00 hian Aizawl veng lian pahnih Lammualah an intawng dawn a, Chanmari FC an hneh loh zawhah Chhing-cows-in 'Chhinga Veng - nuam nuam nuam' an la tirual thei. Dinthar FC-in table mawngphah aṭanga khai chhuak turin coach atan an veng pa Lalhlupuia Sailo an
ṭahawh a, Dinthar mipui tan an veng pa ṭawiawm chu an tih makmawh a ni.
Coach 3-na Hlua
MPL ṭan hmain Lalchhuan-awma'n Dinthar FC a enkawl a, Chanmari FC coach hlui hian MFA aṭanga naupang zin chhuak turte nen Germany an pan dawn avangin LCh-a thachhangdawltu Lalrintluanga (Saitea) chu team enkawl tura ruat a ni.
Coach Saitea hnuaiah Din-thar FC-in goal khat lekin Ramhlun North an hneh lo a, champion rinkai Chanmari FC hial draw zui mah se Chanmari West laka goal li ngawt an chhuah avangin tun season-a a vawi hnih nan coach an thlak.
Dinthar coach thar Lalhlua hi Dinthar Vengin kum 2000-a Inter Village tournament an champion ṭum khan captain a ni a, a inkhelh hun laia defender huaisen hian a captain-na hnuaiah tho an veng team chu CYMA Football 2002-ah a champion pui leh bawk.
Veteran coach Vanlalhluna leh Hlua te kaihhruaina hnuai-ah Dinthar-in Red Ribbon Football-ah final ṭum hnih zet an lut a, CYMA Football hnuhnung berah Hlua'n an veng Dinthar chu semifinal a thlenpui leh bawk.
Tun ṭuma Hlua enkawl tur erawh MPL club Dinthar FC a ni dawn a, veng tan tiin an veng club chhiat lai berin hmingchhiat huamin tualchhung football-ah a rawn zuang lut.
Relegate loh?
Dinthar FC coach thar Hlua chuan, "Keini chuan theih-tawp chhuaha point sual chhuah bak tih theih kan nei lo, kan team hian loan hmanga tualchhung player pahnih kan lak theih kan hmang zo tawh. Match hnuhnung bera hnawhchhuah Lalbiaknia bakah mimal harsatna vangin Kolasib tlangval Achhuana kan chhawr thei lo," tiin an squad a pan belh zel thu a sawi.
Beisei erawh a neih thu sawiin Dinthar boss chuan, "Tun season-ah chuan relegate loh kan tum. Chhinga Veng inkhel hi ka en let nasa tawh a, an laka point hlawh chhuak turin tum kan nei a, kan inzir nasa bawk. Ka player-te huaisen taka an khelh ka beisei a, kan zir anga an khelh theih hi ka duhthusam a ni," a ti.
Keeper leh Inhliam
Chhinga Veng keeper pahnih chetsual vangin Chanmari FC lakah MPL kaithar an mualpho a, hemi ṭuma inhliam MPL2 best forward MS Dawngliana'n training a la zawm thei lo.
Hei chauh hi a ni lo, player lang-sar H. Lalmuankima, Ronald Zothanzama, R. Laldinliana, Lal-ramliana Varte leh Lalkhaw-pui-mawia-te hi dam chiang lo vek an ni.
Chhinga Veng coach Lalremtluanga chuan, "Dinthar aiin player kan nei ṭha zawkah kan ngai a, kan chak theih ngei pawh ka beisei. Chhinga Veng mipuiin min ṭawiawm ṭha char char a, an lawmna siam hi kan duh a ni," tiin chak ngei an tum thu Vanglaini palai a hrilh.
MPL kaithar hian Dinthar hmaah foreign player chhawp chhuah hman tum mah se document fel hman loh avangin an la chhawr thei dawn lo bawk.
Dinthar coach hlui RT-a chuan, "Dinthar FC hi MPL-a ka club enkawl hmasak ber an ni a, min ring ngamtu club hi ka tan chuan an hlu a, ka zah em em bawk. Amaherawhchu football-ah chuan chak tuma kan beih a ngai a, anni pawhin an hriatthiam a ṭul ang," tiin a club hlui chu hneh ngei a tum thu a sawi.