Vinolas leh Verdasco tla nghal

Spanish duo Albert Ramos-Vinolas leh Fernando Verdasco te chuan Thawhlehni khan ATP World Tour 250 Series zinga inelna pakhat St. Petersburg Open-ah an match khatna khelin an tla nghal.

Sibur Arena-a inkhel-ah seeded parukna Vinolas chu world number 255 Alexandre Sidorenko lakah darkar khat leh minute 23 chhungin 7-5, 6-2 in a chak lo. Khawtual tlangval Sidorenko hi kumin bikah ATP Tour-a vawi khat a chakna chiah a ni hial.

Inkhel dangah world number 7 hlui Verdasco chuan Dusan Lajovic lakah set khatna la nghal mah se 2-6, 6-3, 6-2 in a chak lo a, Daniil Medvedev chuan Alexander Bublik chu 6-4, 6-0 in a hneh ve bawk.

Grand Slam hnuhnung ber US Open champion Stan Wawrinka pawh St. Petersburg Open-ah hian a inlan ve a, nizan khan a match hmasa ber khelin Lukas Rosol a hmachhawn a, he thu buatsaih lai hian result kan hre hman lo.