Del Potro a inringtawk

US Open champion hlui Juan Martin del Potro chuan November thlaa Croatia nena Davis Cup final an khelh tur a thlirlawk a, an ram Argentina chuan inrintawkna sang tak nen nomawi an chawi theih a beisei thu a sawi chhuak.

World number 4 hial pawh lo ni tawh Del Potro hi a banrek vawi thum ngawt an zai avanga kum khat chhung a inkhelh theih loh hnuah kuminah a lo kir leh a, a vanglaia a forehand na tak ang kha a nei chho leh mek.

Kum 27-a upa Del Potro hian kartawpa khelh zawh Davis Cup semifinal singles match hmasa berah world number 2 Andy Murray hnehin chmpion lai Britain an vaw tla nghe nghe - an ram chanchina a vawi khat nan champion an tum dawn.

Rio Olympic silver medalist Del Potro chuan, "A tira kan tum chu final luh a ni a, inpumkhat taka kan beih avangin final kan lut tawh. Kan duhthusam ti puitling tur chuan Croatia kan hneh a ngai," tiin a sawi.

Del Potro chuan sawi chhunzawmin, "A vawi thum nana Davis Cup final ka khel thei tur hi ka lawm a, tunah chuan inbuatsaih ngawrh hun a ni. Tun hnaiah ka khel ṭha chho hle a, tun hma lama ka game erawh ka la phak lo. Final kan khelh hmaa hun a la tam avangin champion ngei turin kan inbuatsaih ang," tiin a sawi.