FIFA 17-ah Iceland tel dawn lo

Kum tina FIFA games siam ṭhintu Electronic Arts chuan Iceland nen sum chungchangah inremna an neih theih loh avangin gamers tam takin an nghahhlelh FIFA 17-ah Iceland an tel dawn lo.

Euro 2016 khelh zawh takah khan beisei phak bakin Iceland hi an che ṭha a, an result avang hian mi tam zawk chuan FIFA 17-ah hmun an chan ngei an beisei. Mahse, Football Association of Iceland (KSI) chuan EA-in £11,501 (Rs. 10,00,855) leka an dawrna chu tlem lutuk tiin an pawm duh lo. EA dawrna hi KSI hian pawm se chuan EA hian intihlar nan Iceland team engkim an hmang thei dawn a, an dawrna hi a tlem mah mah niin a lang.

KSI president Geir Thorsteinsson chuan,"EA hian an game siama kan tel theih nan rights lei min dil a, mah se min dawrna zat hi ngaihtuah chuan a thlawna indil ang vel a ni. Euro kan khelh dan
aṭang khan team ṭha tak kan nihzia chu a hriat a, mi tam takin kan team hmanga he game hi khelh an duh tih ka hria. Kan player-te lakah pawh a pawi kan ti a, mah se sawisel tur an awm a nih chuan sawisel tur chu EA an ni," tiin a sawi.

Thorsteinsson chuan sawi chhun-zawmin,"Hetiang meuha rights lei kan indil dawn a nih chuan zah takin kan indawr tur a ni a, ka ngaihdanah chuan EA min dawr dan hian a zir lo a ni," tiin a lungawi lo hle.

Karleh maia tlangzarh tur FIFA 17-ah hian ram 47 national team telh an ni dawn a, FIFA ranking-a 27-na Iceland an tel dawn loh laiin FIFA ranking-a 148-na ni mek India chu he game-a tel phak zinga ranking hniam ber an ni.