Inlehthalna ropui lantirtu Chelsea

Thawhlehni zan English Football League Cup (EFL Cup)-ah Liverpool hneh lo hlim Chelsea an tawlhthlu nawn dawn nia a lan hnuah huaisen takin an tho leh a, Leicester City laka si hnih an phurh zet hnuah 4-2 a hnehna changin EFL Cup fourth round an lut.

Mualneitu Foxes-in minute 35 chhungin Shinji Okazaki goal hnih hmangin hma hruai hman mah se Blues-in Gary Cahill leh Cesar Azpilicueta hmanga an sut hnuah extra time khelh a ni a, minute 89-naa defender Marcin Wasilewski hnawhchhuah vanga talbuai Foxes lakah Cesc Fabregas chuan goal hnih khung ve lehin 4-2 in a chak zawkah an ṭang ta a ni.

Team pahnih an inhlauh loh tawn avangin inkhel a hmuhnawm takzet a, chance inneih chhawk zak zakin hun tawp hnaih lama Diego Costa nghawk luitu Wasilewski hnawhchhuah a nih kha Leicester chak loh bul inṭanna chu a ni. Claudio Ranieri-a'n Champions League khelh tur a neih miau avangin Antonio Conte ai chuan chak loh hi a pawi ti lo zawkin a rinawm a, tlarhma lama a naute khelh danah lawmna tur a nei bawk.

Tlarhnung talbuai

Chelsea-in tun season-a an match zawng zawngah goal khung vekin tlarhma an neih ṭhatzia hrilh nawn kan ngai lo - tlarhnung remkhawm thiam vanga hmingṭha Antonio Conte tana buaina tur erawh an tlarhnung phui tawk lo ṭhin hi a ni.

Blues hian an match hnuhnung 14-ah vawi khat chiah goal chhuah loh an nei a, Leicester khelmuala an goal chhuah pahnih pawh hi tlarhnung ṭhat tawk loh vang tih loh rual a ni lo.

Ahmed Musa ball cross satliah tak nia lang chu Azpilicueta chetsual vangin Okazaki-a'n a khung a, Japanese forward-in Foxes goal hnihna a thunna kawngah pawh Blues tlarhnung ten an tih tur an ti tawk lo tih a lang - tun thleng chuan Paris Saint Germain aṭanga David Luiz an lakletin awmzia a la nei lo niin a lang.

Cesc-a lo kir e

Juventus boss hlui Conte-a'n Chelsea a enkawl hnuah Jose Mourinho hnuaia player pawimawh Fabregas-a'n hmun a chang phak meuh lo a, tun season Premier League match a khelh tawhah bench aṭanga tlan lut vekin inkhel bul a ṭan pahnih chu EFL Cup-ah ve ve a ni.

Mahse, Spanish midfielder hian ṭawngkaa Chelsea kawr hak a phu zia sawi chhuah aiin khelmuala lanchhuahtir a thlang zawk a, Leicester an hnehna inkhela an player pawimawh berah chhal ngam a ni. Extra time-a goal hnih a khung bakah Cahill-a goal khung tur a siamsak bawk.

Kum 29-a upa midfielder hi goal a khung theih loh avangin sawisel a lo tawk fo tawh
ṭhin a, Thawhlehni zanah erawh season hmasaa goal ruk khungtu hian goal hnih hmangin amah sawiseltute a chhanglet a, Conte-a tan inngaihtuah nawn a ṭulzia a lantir.

Conte hnuaia harhtharna chang mek Eden Hazard-a la dam hman lo a, minute 89-naah Belgium winger hi khelmualah lut ve chauh mah se a hun neih tlem a chhawr ṭangkai hman tho a, Fabregas goal hmasa zawk luhna tura a che vel chu 'a bu ang thlap' mai a ni.

Eng nge an sawi?

Leicester boss Claudio Ranieri chuan, "2-0 a nih thleng kha chuan kan khelh danah ka lawm a, ṭha taka bul ṭanin inkhel kan thunun a ni. A pawi ber chu kan goal hmasa ber kan chhuah dawna Luiz leh Cahill kan veng tawk lo kha a ni. Extra time-ah khan ka naute chu theihtawp chhuah turin ka fuih a, mah se Fabregas khan engkim a ti harsa ta vek a ni," tiin a sawi.

Chelsea boss Antonio Conte chuan," Ka duh chu hnehna chan a ni a, a bak duh ka nei lo. Player hming langsar lam ka ngaihtuah lo a, inkhel tura ka tih player-te hian duh ka thlang sual lo tih hi min hmuhtir fo se ka duh a ni," a ti.

Conte chuan Fabregas chungchang sawi chhunzawm nghalin,"Cesc khan game ṭha tak a khelh avangin ka lawmpui takzet. Training-naah a thawkrim em em a, a nungchang hian minti lawm a ni. Ka player-te inkarah inelna awm se ka duh a, match kan khelh dawn apiangin duhthlan tur ṭha ber ber nei reng thei ila ka duh a ni," tiin Spain international chunga a lawm thu a sawi.