Dortmund leh Real an inhnehtawk Real Madrid hlau lo Dortmund an vanduai

Borussia Dortmund khelmuala lenglut Real Madrid-in point thum hlawhchhuah inbeisei mah se German club nen 2-2 a inhnehtawkin point khat an hlawh chhuak hram.

Mualneitu club-in point khat hlawh chhuak turin minute 87-naa Andre Schurrle goal mamawh mah se inkhel pumpui thlirin chance ngah zawk an ni a, goal hnih aia tam an chhuah loh avangin Real Madrid an vannei.

Inkhel ṭan aṭanga minute 17-na lekah Zine-dine Zidane-a nauten Cristiano Ronaldo hmangin goal hmahruai an khung a, Portuguese forward goal khung theihna tura Gareth Bale-a backheel pass chu a mawi danglam hle.

Dortmund-in hun
ṭha an khawhral fo hnuah Real keeper Keylor Navas tihsual an nangching ta nge nge a, Pierre-Emerick Aubameyang chuan an si phurh sut nan a hmang.

Team pahnih 1-1 a an inhnehtawk hnua goal khung leh hmasatu chu Real bawk an ni. French defender Raphael Varane chuan minute 68-naah a vawi hnih nan Real hma a hruai pui a, goal khung harsat Dortmund an tlawm ngei dawn niin a lang hman.

Mahse, beidawng duh lo Dortmund-in an nawr chhunzawm reng a, hun tawp nan minute thum chiah a awm tawh tihah Dortmund an vannei ve ta nge nge a, Andre Schurrle chuan an siphurh sutna goal mawi taka khungin an inhnehtawk.