Juventus an chak

Serie A champion Juventus-in an match hmasa berah goal khung loin Europa League champion lai Sevilla inhnehtawkpui mah se an match hnihnaah erawh an tho chiang hle. Italian club hian an mikhualna ramah Croatian club Dinamo Zagreb chu 4-0 in an sawp a, Miralem Pjanic, Gonzalo Higuain, Paulo Dybala leh Dani Alves te chu goal khungtu an ni.

Juventus manager Massimi­liano Allegri chuan, "Champions League-a kan chak hmel hmasa ber kan hmu thei hi ka lawm takzet a ni. Ka duh dan takin inkhel bul kan ṭan a, second half-ah erawh tihsual kan neih nual avangin hmasawn kan la mamawh a, hna kan thawh chhunzawm zel ang," tiin a lawm a la kim lo.

Goal khungtu Pjanic chu hliam vangin minute 46-naah lakchhuah a ngai a, Bosnia and Herzegovina international chuan, "Ka chawnah hliam ka tawrh avangin ka inkhelh chhunzawm zel kha a rem lo a, hliam na tak a nih loh hram ka beisei," tiin a hliam dinhmun a la hriatchian bik loh thu a sawi.