Leicester City an kal zel

Premier League champion Leicester City-in thawnthu ngaihnawm an ziah zawm zel - Claudio Ranieri a naute hian Champions League-a an match hmasa bera Club Brugge 3-0 a an sawp hnuah Thawhlehni zan khan a vawi khat nan Champions League chu King Power Stadium-ah an thleng a, Portuguese club
ṭha Porto chu Islam Slimani goal khat khung hmangin 1-0 in an hneh - Sporting Lisbon tana Champions League lama lo inlan tawh Slimani hi Algeria player zinga club pahnih tana Champions League-a goal khung thei hmasa ber a ni.

Foxes goal neihchhun hi minute 25-naah a lut a, Algerian winger Riyad Mahrez ball cross ṭha tak chu a hnampui Slimani-a'n harsatna nei loin a lo tauh lut. Porto tan substitute Jesus Corona chuan an si phurh sutna hun ṭha nei mah se post a pet per a, Leicester an ṭang tluan - Foxes hi England
aṭanga Champions League khel thei club 10-na an ni a, Europe-a club inelna sang bera an inlan vawikhatnaa match hmasa pahniha chak ve ve thei awmchhun an ni bawk.

'The Dragon Slayer'

Leicester player manto ber ni tura pound maktaduai 29-a King Power Stadium pantu Slimani hian tun hma aṭanga Porto a ngam theih em avangin a hminglemah 'The Dragon Slayer' (Milian suattu) tiin koh a lo ni tawh - Algeria international hian kum 2016-a Porto a hmachhawn tawh vawi thumah goal nga zet a khung tawh!

Tun thleng chuan Slimani manah Foxes an la inseng sual lo niin a lang. Kum 28-a upa forward hian nipui transfer tawp nia Leicester a zawm hnuah Premier League champion tan hian match li khel tawhin goal thum a khung a, a goal khungte hi a lu hmanga a khung vek an ni.

Ranieri a hlim

Leicester boss Claudio Ranieri chuan, "Hun tawp lam minute 10 chhung khan kan talbuai deuh a, mah se hnehna pawimawh tak kan chang thei. Kan rilru zawng zawngin kan khel a, tihsual kan neih apianga kan insiam-
ṭhat nghal zel avangin ka hlim a ni," tiin a naute khelh danah a lawm hle.