Chanmari West damna Dampuia

29th September, 2016

Chanmari West FC-in kumin I Day Football finalist Ramhlun North FC chu Thawhlehni zan khan 2-0 in an hneh a, HC Zarzoliana hote hi Mizoram Premier League Season 5 khelh mekah pathumnaah an invawrh chho. West Warrior tan captain Laldampuia'n goal hnih a khung a, Kawrtethawveng tlangval hi man of the match a thlan a ni.

Zara Zarah

MPL2 aṭangin Chanmari West FC-in Mizoram football inelna sang ber an khel ṭan a, MPL3-ah palina niin an thlen san ber ṭum ni mah se a sang palia an lan ṭum hian semifinal a awm lo. MPL4 aṭangin semifinal a awm ṭan a, kumin hi West Warrior ṭhat ber ṭuma ngaih a ni.

Chanmari West hian coach tawnhriat nei ṭha HC Zarzoliana an lakluh theih avangin Laldampuia, R. Laldanmawia leh Lalmuansanga ten Dinthar FC-a an pu hlui hi an zui a, West Warrior-in defensive game chauh khel loin attacking football an khel tawh.

Captain Dampuia

West Warrior captain Dam-puia hian Bethlehem Vengthlang FC lamah goal ropui a khung tawh a, hemi ṭum hian Zara hote an ṭangtluan thei lo. Thawhlehni zanah Dampuia'n goal a khung leh ta a, field sir leh lama awm Danmawia a langsar bawk.

Minute 24-naah Lianzama vawrh luh chu Danmawia'n captain tan pe letin Dampuia'n a pet goal chiang hle. Hun tawp hma minute riat chiah a awm tawh tihin wing back Vanlalzuia throw-in na tak chu Ramhlun North tlarhnung ten hmun himah an petchhuah theih loh avangin Dampuia'n a goal hnihna leh chak nemnghehna goal a khung.

Danmawia'n goal khung lo mah se Sialhawk tlangval a hmuhnawm. MPL1 best player hian goal chung chiahah kawh zetin a pet a, pakhat erawhin crossbar a per thung. Forward Lianzama'n keeper chauh a hmachhawn hnunah goal khung lo mah se Lunglei tlangval thahrui ngah hi goal nawrna kawngah player pawimawh a ni.

Ramhlun North lam...

Ramhlun North an khel ṭha tawk lo a, chak an phu lo na^-chungin vanneih ṭum chu ni se point hmu thei an ni. First half-a Zosangliana freekick-in crossbar chunglam a per a, second half-a Chhaia freekick erawh Chanmari West keeper Lalruatpuia'n (Mama) a dan sak.

MPL kaithar forward Vanlal-thlamuana'n minute 31-naah kawh zetin goal sirah a pet a, West Warrior keeper Mama'n goal ngei tura ngaih hi a dang hman. Chanmari West captain Dampuia'n man of the match a phu a, keeper Mama thawhrah erawh hmuh hmaih a thiang lo.

Zara a lawm

Chanmari West coach HC Zarzoliana chuan, "Ramhlun North khelh an harsa a, anni laka point thum kan hlawhchhuah avangin kan lawm hle a ni. Kan tlarhmate khelh danah ka lawm a, ṭha taka kan khelh chhunzawm theih ka beisei," tiin Vanglaini palai a hrilh.

West Warrior boss hian Zo United laka goal an khung theih loh hnuah tlarhma an tah hriam tur thu a sawi a, Dinthar leh Chanmari coach hlui Zara thusawi dikna Ramhlun North an khelh ṭumin a lang.

Tute nge inlan?

Ramhlun North (4-2-3-1) : David Lalrinpuia; Lalmalsawma, Lalramthlamuana, Lalmuanawma; Lalchhuanpuia (David Lalrinchhana 46'), Lalruatkima Dosel; Jerry F. Zonunsanga (Lalchhanchhuaha Fanai 61'), Zosangliana, B. Malsawmzuala (MC Malsawmzuala 67'); Vanlalthlamuana.

Chanmari West (4-1-4-1) : Lalruatpuia; Vanlalzuia Hnamte, R. Lalawmpuia, Toky Zomuanpuia, Calvin Zosiamliana; R. Laldanmawia, Lalmuansanga (Lalmuanzuala 72'), K. Lalnunzama, Lalbiakhlua, Laldampuia, H. Lallianzama (Ramengmawia 86').

ZoFooty Statistics

Ramhlun North 0 - 2 Chanmari West

CWFC : Laldampuia 24', 82'

MoM : Laldampuia, CWFC

52% Ball Possession 48%

12 Shots 16

4 On Target 9

2 Yellow Cards 1

0 Red Cards 0

Powered By Rainbow Multibrand

Mobile Showroom