Garbine Muguruza chak lo nghal

Hmeichhe tennis world number 3 Garbine Muguruza chuan Thawhlehni khan Wuhan Open-a a match hmasa ber khelin a tla nghal. Hetih lai hian world number 1 a nih hnua a match hmasa berah Angelique Kerber chuan hnehna a chang thung.

China-a inkhelah hian seeded pahnihna Muguruza hi world number 1 hlui Jelena Jankovic lakah 6-4, 7-6 (7-2) in a chak lo. Serena Williams dinhmun phet tla a number 1 ni mek Kerber pawhin awlsam takin hnehna a chang mai bik lo a, Kristina Mladenovic chu 6-7 (4-7), 6-1, 6-4 in a hneh hram a ni.

French Open champion Muguruza chuan, "Inkhel thunun ka tum lutukna lamah tihsual ka nei hnem em em a, a tawpah ka tuar ta a ni," tiin a sawi. Spain nula hian a match hmasa berah hian vawi 42 zet unforced errors a nei a, hei hi chak loh pui thlam a tling.

Inkhel dangah champion lai Venus Williams chuan darkar khat leh minute 10 chhungin Yulia Putintseva chu 6-3, 6-2 in a hneh. US nula dang Madison Keys bakah Dominika Cibulkova leh Johanna Konta ten an match hmasa berah hnehna an chang vek bawk.