United leh Mourinho tan fiahna
Jose Mourinho enkawl Manchester United chuan zanin dar 12:15 hian Europa League group match khel turin Ukrainian club Zorya an lo mikhual dawn a, Portuguese manager tan tihsual siamṭhat theihna hun ṭha a ni ang.
United hian an group match hmasa zawkah Feyenoord chu 1-0 in an hneh lo a, khawvela player manto ber Paul Pogba neitu tan mualphona a ni. Hetihlai hian Zorya erawhin Fenerbahce an inhnehtawk pui avangin point khat an nei tawh thung.
Manchester United leh Zor-ya te hi an vawi khat intawnna tur a ni a, Zorya tan tun ṭum hi Premier League club hrim hrim an vawi khat hmachhawnna tur a ni hial. United erawhin tun hmain Ukrainian club vawi ruk an hmachhawn tawhah chak loh an la nei miah lo, vawi li hnehna changin ṭum hnih an inhnehtawk - Old Trafford-a an mikhual hnuhnung pathum lakah phei chuan goal chhuah loin hnehna an chang vek.
Ibra tel dawn lo?
Manchester United hian a zawna match thum chhung chakni hmel an hmuh loh hnuah League cup-ah Northampton Town hnehin kartawp Premier League-ah khan champion lai Leicester City 4-1 in an sawp zui bawk. Foxes an sawp ṭuma inkhel bulṭan tura thlan loh zinga mi Wayne Rooney a inlan a beiseiawm a, hetihlai hian nipui tarsfer laia Paris-Saint Germain aṭanga lakluh striker palian Zlatan Ibrahimovic chu chawlh pek a ni thung!
Kum 30-a upa Rooney hian Manchester United tan UEFA competition-ah goal 36 a khung tawh a, club tana goal khung hnem ber Ruud van Nistelrooy (37) tluk turin goal khat bak a mamawh tawh lo. England international hi a inlan a nih chuan a club tan sulhnu thar a hnutchhiah theiin a rinawm.
Kum 34-a upa Ibra hi Mou-rinho-a'n a bikin chawlh a pe nia sawi a ni a, Thawh-
ṭanni khan Milan-ah chawlh a hmang. Ibra chawlh pek a nih avang hian Marcus Rashford tan khelhna hun a inhawng zau zela tihna a ni a, England rawlthar duhawm hian a zawnin match thum chhung goal a khung tawh.
Mikhual
Manchester United mikhual tur Zorya hi Old Trafford-ah an mikhual dawn a ni satliah lo a, Ukrainian club hi Europe-a inelnaah hian an mikhual rih hle. Kum 1972 daih tawh khan Soviet Vysshaya Liga title lain a hnu kumah European Cup-ah an lo inlan ve tawh a, hemi ṭum hian last 16-ah Spartak Trnava hneh loin an tla.
Kum 1973 hnulamah Zorya hi hi European competition-ah an la inlan leh ngai lo a, kumin hi an inlan lehna tur hmasa niin United tan khingui hautak tura ngaih an ni lem lo. Nikum khan Ukrainian Premier League-ah palina an ni a, pathumna Dnipro Dnipropetrovsk chu UEFA Club Financial Control Bod-in an hrem avangin Europe-a inlan theihna hun an neih phah.
Saints inlan dawn
Premier League club dang Southampton chu zanin dar 12:15 tho hian Hapoel Be'er Sheva hmachhawn turin Israel-ah an zin thung ang. Saints hian an group match hmasa zawkah Sparta Prague 3-0 in an sawp tawh a, hemi hnuah league match thum khel leh tawhin Swansea City, Crystal Palace leh West Ham te an hneh leh tawh a, goal an chhuah miah lo bawk - an boruak ṭhat vanglai a ni.