LeBron leh Curry ten hnam puanzar an zah

NBA star LeBron James leh Stephen Curry te chuan US hnam hla an zah thu leh a sak laiin an din tur thu an sawi chhuak.

Tun hnaiah US-ah mihang ṭhenkhatin an dinhmun a hniam deuh bik nia ngaiin American football player Colin Kaepernick chu hnam hla an sak laiin a ding duh lo a, hei hian sawi zui a hlawh hle.

Cleveland Cavaliers thiampuipa LeBron chuan, "Kaepernick chet dan kha ka demin ka pawmpui lo tihna a ni hran lo. Mahse, hnam hla sak laia zahna lantir nana din chu ka tih tur a ni," tiin a sawi. Kum 31-a upa James hian season hmasa khan Golden State Warriors hnehin Cleveland chu a vawi khat nan NBA champion a nihpui.

Golden State Warriors guard Curry chuan, "Inhnialna leh sawi zui tur tam tak a awm a, ngaihdan leh thlir dan pawh a inang lo hle bawk. Kei chu hnam hla an sak laia ding turin ka inruahman," a ti.

NBA season thar chu October 25 hian ṭan a ni dawn a, team 30 an inel ang. Team 30 hi Eastern Conference leh Western Conference-ah team 15 ve vein ṭhen hran an ni a, a tawpah NBA champion zawn ṭhin a ni.