Serena Williams la chawl dawn lo

Serena Williams hi kum 35-a upa a ni tawh a, tun hnaiah hliam a nei deuh reng bawk. Hetichung hian American star hian tennis chawlhsan mai a la tum lo a, season thar bulṭan nan Janaury a khelh tur Auckland Classic chu a thlang.

Grand Slam vawi 22 champion tawh Serena hi tun hma zawng chuan Australian Open inbuatsaih nan Auckland-ah hian a la inlan ngai lo a, Hopman Cup-a khel zawk
ṭhin - kum tharah erawh a thil a danglam dawn ta tihna a ni.

Tournament director Karl Budge chuan, "Serena hi khawvela infiamna huanga mi langsar leh ropui a nih avangin kan tan chuan a rawn inlan thei tur hi thu lawmawm tak a ni," tiin a sawi.

Kumin Grand Slam tour-namet hmasa ber Australian Open final-ah khan Serena hian Angelique Kerber lakah a nomawi a chan a, German nula lakah vek hian tun hnai khan chawlhkar 186 zet number 1 a nih tawhna chu a chan bawk. Tun dinhmunah Serena hi hliam vangin inkhel thei lo mah se ṭha taka rawn kir a tum hle.

Serena chuan, "Tun hmain Auckland-ah ka la inlan ngai lo, hun thar leh boruak thar tawn a chakawm a, kum bul ṭanna ṭha tak a nih ka beisei," tiin a sawi.