SL Sailo EFC an champion

Aizawl DFA buatsaih season opening tournament-ah SL Sailo EFC chuan FC Bethlehem chu 2-0 a hnehin Second Division-ah an champion. Third Division inelnaah Vai-vakawn FC-in Durtlang FC chu 2-1 a hnehin nomawi an chawi ve bawk.

Vawiin hian Aizawl DFA hnuaia inelna sang ber Haier First Divison League chu khelh chhunzawm a ni leh bawk ang. Chhun dar 11:30 hian RG Stadium-ah Aizawl FC Academy leh Ramhlun FC te an inkhel ang a, tlai dar 1:30-ah FC Kulikawn leh Chawnpui FC te an inhmachhawn leh bawk dawn a ni.

First Divison-ah hian team pariat awmin league-in an khel a, season tawpah a sang pahnihin final an khel ang. Aizawl DFA hnuaiah hian league chhawng thum a awm a, table sang lama awm pahnih an kaisan theih ang bawkin table mawng phaha awm an tla thla thung. First Division chunga awm erawh Mizoram Premier League a nih tawh avangin Aizawl DFA hnuaia first division finalist te hian Mizoram league sang ber khel turin qualifier an khelh a ṭul thung.

Second Division leh Third Division inelna hi knockout hmanga khelh niin champion team-in point 15 an hmu a, pahnihnain point 10 hmuin semifinalist team pahnihin point sarih an hmu bawk. Tun season-ah Season Opening Tourney bakah hian Season Closing Tourney a awm leh ang a, inelna pahniha result hian club hmalam hun a hril ang.

Inelna Thlirna Tawi

Second Division Final

FC Bethlehem 0 - 2 SL Sailo EFC

EFC : R.Lalropianga 8'; David Lalchhuanawma 28'

Champion SL Sailo EFC (Trophy & Rs 20000)

Runner Up FC Bethlehem (Trophy & Rs 10000)

Fair Play SL Sailo EFC Rs 1000

Top Scorer Johny VL Muanpuia (Goal 4), Zarkawt FC

Best Player Lalropianga, SL Sailo EFC

Third Division Final

Durtlang FC 1 - 2 Vaivakawn FC

DUR : Lalfamkima 54'

VAI :Zomuanthanga 45+2'; Lalduhawma 78'

Champion Vaivakawn FC (Trophy & Rs 12000)

Runner Up Durtlang FC (Rs 7000)

Fair Play Sihphir Venghlun Chhimveng FC (Rs 1000)

Best Player Moody Lalawmpuia, Vaivakawn FC

Top Scorer Lalduhawma (Goal 7), Vaivakawn FC