Tlai ni nemah GOAL hmuh tur a awm dawn! Chhinga Veng Vs Bethlehem VT

Mizoram Premier League Season 5 hmahruaitu Bethle-hem Vengthlang FC coach Lalbiaksanga Colney chuan player pawimawh panga in-hliam an nei chungin attacking football an khelh tur thu a sawi a, point mamawh Chhinga Veng FC-in coach thar Chawng-thansanga hnuaiah goal khung ngei an tum bawk ang.

Vawiin tlai dar 2:30 hian Lammualah Aizawl veng lian pahnih Bethlehem VT leh Chhinga Veng te an inhma-chhawn dawn a, league hma-hruaitu hi ṭantute nei ṭha zinga mi an ni. An khingpui Chhinga Veng hian an bei-sei ang result an la hlawh chhuak lo chungin ṭantu an nei chhe ngai lo - MPL5-ah ṭantu nei
ṭha ber an la ni hial ang!

Damdawi In

Bethlehem VT-in an match hnuhnung bera Dinthar an hneh ṭumin inhliam vangin forward PC Zosangliana an chhawr thei lo a, captain Lal-dingngheta chu inhliam vang-in minute 20-naah lakchhuah bakah Kolasib tlang-val Lal-rintluanga'n (Tuka) hliam nei chungin a khel tluan bawk.

BVT-in an khelh apianga point an neih belh ang thoin inhiam an neih belh zel a, training-naah right back Lalmalsawma a inhliam zui a, khelmual pawnah defender Lalthanzama Fanai a inhliam bawk.

Player panga hi an chhawr thei dawn lo a, hliam dam chiang lo chungin Laldinpuia leh Lalnghinglova (MP-a) te an khelh a ṭul hmel bawk.

Attacking Football

BVT coach BS-a chuan, "September-a match hnuhnung ber a nih avangin inkhel pawi-mawh bik a ni. Defensive game khel tur pawhin player ka nei chuang lo a, attacking football khelh hi kan tum lawk leh kan tih theih awmchhun a ni," a ti.

October thla aṭangin tualchhung football transfer hawn a ni leh tawh dawn a, BVT boss hian hemi hmaa point hmuh tam a pawi-mawh thu a sawi lang.

League hmahruaitu BVT hian Ramhlun North an draw tih loh chu an khingpui zawng zawng an la hneh vek a, chung zingah chuan champion lai Aizawl FC, Zo United, Chanmari West FC leh Dinthar FC te an tel.

Attacking football sawi vul mah se record thlir letin BVT chakna hnar chu an tlarhnung phui ṭha a ni a, keeper Malsawmdawngzela'n goal khat chiah a la chhuah. Khawzawl tlangval Mala bakah hian defence laia inkawp H. Lalhlimpuia leh Laldinpuia ten an thawh hlawk hle bawk.

BVT hian an mamawh goal erawh an khung ziah a, match nga khelh tawh aṭangin goal ruk an khung a, goal an khung loh ṭumah goal an chhuah loh avangin hneh loh an tawng lo. Result ṭha an neihna kawngah coach BS-a'n a fak a phu a, Dinthar an hneh ṭumin player pahnih inhiam vanga an lakchhuah hnuah goal khung turin a nawr lui a, point thum hlu tak an hlawh chhuak.

Chhinga Veng...

Chhinga Veng coach Chawng-thansanga chuan, "BVT hi hmahruaitu an ni a, match nga lai khelh a nih tawh avangin vanneih vang a ni lo. Anni laka point hlawh chhuak tur chuan kan fimkhur hle a
ṭul dawn a, attacking football khelh ngawt a finthlak lo ang," tiin chak tum siin fimkhur taka khelh a ṭul tur thu a sawi.

MPL kaithar hian Aizawl FC an hneh loh ṭuma inkhel bul ṭan Lalthlamuana leh Isaac Lalremruata te inhliam vangin an chhawr thei dawn lo a, anni bakah hian Ronald Zothanzama, MS Dawngliana leh Laldinliana te an la chhawr thei lo bawk.

Chawnga chuan, "Player in-hliam ngah mah ila ka player-te an phur, veng chhung mipuite
ṭawiawmna kan mamawh. Player ṭha kan nei a, Aizawl FC lakah hun rei zawng kan chungnung theih bawk avangin tuna kan mamawh chu vanneihna a ni," tiin Vanglaini palai a hrilh.

Engtin zel?

Chhinga Vengin inhliam nei ve tho mah se season ṭan hmaa an pawisa hman dan thlirin player an nei chhe lo. BVT-in Chanmari FC lakah coach Lalsangzuala Hmar leh player ṭha an chân bakah Chhinga Veng lamin striker Dawngtea leh defender Dinliana te an chhuhsak.

MPL5-a relegation battle a tel tura mi ṭhenkhatin an dah BVT hi coach BS-a kaihhruaina hnuaiah table hmahruaitu an ni thei a, Chhinga Veng laka point an hmu leh thei a nih phei chuan semifinal lut chiang turin match tam an mamawh tawh lo ang.

Chhinga Veng hian goal kua chhuah tawhin a mawnga awm Dinthar tih loha goal chhuah hnem ber an ni. Goal sarih khung tawhin a khung hnem ber dawttu an ni bawk - team mak tak an ni!