Vardy-a'n Arsenal a hnar chhan a sawi

Leicester City star Jamie Vardy chuan nipui transfer laia club lian zawka ngaih Arsenal a zawm loh chhan chu a khelh thiam dan leh Arsene Wenger-a naute khelh dan a inmil loh vang nia a hriat thu a sawi.

Season hmasa khan England international hian league-ah goal 24 khungin Foxes chu a vawi khat nan Premier League nomawi a chawi pui. Striker ma-mawh Wenger-a'n Vardy hi lakluh tumin a be ngei a, pound maktaduai 20 velin an inrem dawnin lang hman hial mah se a club ngaia khel turin contract a ziak ta zawk.

Kum 29-a upa Vardy chuan, "Alexis Sanchez leh Mesut Ozil an neih avangin goal khung kawngah min puih ngei an ring a, kei chuan ngaidan dang ka nei ve thung," a ti.

Vardy chuan sawi chhun--zawmin, "Arsenal khelh dan hi en ila, anni chuan ball an chanin rang takin an khingpuite an nawr nghal vut ngai lem lo. Leicester-ah chuan ball kan vawrh nasa a, rang takin kan um ṭhin - hei hi ka khelh thiam dan nen a inmil," tiin a sawi.

Champion lai Foxes hian season bul an ṭan fuh viau lo a, league match ruk khelh tawh aṭanga point sarih hmuin table-ah 12-na an ni mek - Vardy hian goal hnih chiah a la khung.