Big Sam hnuh hniamin a awm England manager aṭangin a bang

July, 2016-a England manager atana Sam Allardyce ruat a nih khan an ram team a enkawl châk thu ualau taka lo sawi tawh ṭhintu coach hian, "He hna ka chelh tak avang hian ka nui tawp thei lo a ni," tiin a hlim thu a sawi a, ni 67 a liam leh meuh chuan hlim hmel hmuh tur awm loin Sam Allardyce-a'n England manager hna a chawlhsan.

Sam Allardyce hian Football Association phal loh anga player transfer khawih kual dan tur chungchangah a dinhmun leh nihna chhawr ṭangkaiin thamna sum £400,000 a la a, he thil hi Sam-a rinawm leh rinawm loh fiah nana The Daily Telegraph-in an ruahmanna a lo nih avangin Sam hi a mualpho ta a ni.

FA chuan Big Sam-a khawsak dan chu ngaihdam theih a nih loh thu sawiin inhriatthiam tawnnaa an inṭhen thu an puang a, kum 61-a upa manager chuan thil sual lian tak a tih avanga ngaihdam a dil thu sawiin England Under 21 coach Gareth Southgate chuan manager thar ruat a nih hma chuan England team hi a enkawl lailawk ang.

Sam-a thil tih

The Daily Telegraph reporter pakhat chu sumdawng hausa anga lemchangin Sam Allardyce hi titi na a neihpui a, he reporter hian player transfer chungchangah third-party player ownership kalpui an duh thu a sawi a, hei hi FIFA leh FA phal loh a ni.

England tana training session pawh la buatsaih lo Allardyce chuan FA dan leh hrai chu palzut harsa a nih loh thu leh hetiang kalphung kalpui ṭhin agent engemaw zat a hriat thu a sawi a, inrem nan £400,000 pawisa a dawng.

He meeting-ah hian Sam hian a thlak tak manager Roy Hodgson chu hmusit takin a sawi a, Hodgson-a assistant Gary Neville chu na taka sawisel bawkin an titi na zawng zawng hi video-in a ruka lak vek a ni.

Third-party ownership?

Third-party player ownership an tih hi company-in player-a neitu nihna an lo neih ve hian a ni. Hriatthiam theih dan tur chuan Carlos Tevez leh Javier Mascherano ten kum 2007-a West Ham an zawm khan company pahnih MSI leh Global Soccer Agencies te chuan player pahnihah hian neitu nihna an nei a, player hralh chhuah an nihin a hlawkna teltu ber an ni ṭhin.

Kum 2008 khan FA chuan third-party player ownership hi hman phal loh turin a khap nghal a, FIFA chuan nikum May khan a lo khap tawh bawk.

Tu nge Sam aiawh tur?

Blackpool, Notts County, Bol-ton, Newcastle, Blackburn, West Ham leh Sunderland boss Allardyce-a'n match khatah chiah England a kaihruai hman a, 2018 World Cup Qualifier-ah Slovakia chu 1-0 in an hneh.

England hian October 8 aṭanga November 15 chhungin Malta, Slovenia, Scotland leh Spain an hmachhawn dawn a, heng match liah hian Southgate chuan England team a kaihruai ang. England boss nghet tur hian Bournemouth manager Eddie Howe, Crystal Palace manager Alan Pardew leh Hull City boss hlui Steve Bruce te hming chu lamrik a ni.

Sam-a thukhawchang

Kum 61-a upa manager chuan, "Kan inbiaknaah khan FA remtihpuina a ngaih thu sawi mah ila midang tam tak rilru ka hliam tih ka inhria a, ka inthiam lo takzet a ni. England manager hna chelh zel tlak ka ni lo tih ka pawm a, mimal hming ka lakchhuahte hnenah an ngaihdamna ka dil a ni," tiin a inthiam loh thu a sawi.

England manager ni rei lo ber chuan sawi chhunzawmin, "Ka tluk theih nan dik lo takin thang kam a ni a, chu thangah chuan awkin a tuartu ka ni ta a ni," tiin amah tihchhiat tumtu te avanga a mualpho thu a sawi lang nghal bawk.