Zan lamah AFC Vs Dinthar FC

Season liam ta kha Aizawl FC-in player an neih ṭhat ber ṭum a ni a, hemi ṭum hian AFC hi champion mah se Dinthar FC an hneh lo. Zanin dar 7:00 hian I League club hian MPL1 champion an hmachhawn dawn a, thawnthu hlui ziah ṭhat a ni lo ang tih sawi lawk theih loh.

Season liam ta khan Kelkang tlangval Lal-khawpuimawia goal ropui hmangin Dinthar FC-in Aizawl FC chu 2-1 in an hneh a, hei hi MPL4 bika AFC chak lohna hmasa ber a ni.

Club pahnih an intawn nawn ṭumin captain Samuel Laltlanthanga hattrick hmangin Dinthar FC-in Aizawl FC an chelh nawn. Hei chauh hi a ni lo MPL1 champion hian MPL bika AFC vawi riat an hmachhawn tawhah vawi li an chak a, vawi khat chiah an chak lo!

MPL5-ah erawh Dinthar FC tan AFC laka an record ṭha chhawm nun a har dawn, MPL1 champion hi table mawng-phahah awm mekin vawi nga khelh tawh aṭangin point khat chiah an la hlawh chhuak.

Season bul an ṭan ṭhat loh avangin coach an thlak tawh hial a, coach thar Lalhlupuia Sailo chuan, "Kan tih tur chu goal venhim a ni a, point hlawh chhuak turin theihtawp kan chhuah ang," tiin tlawm saa Lammual an pan loh tur thu a sawi.

Dinthar tana thu lawmawm chu inhliam vanga BVT hmachhawn thei lo defender Lal-remtluanga a dam tawh a, tlarhnung a phui ṭhat sawt beisei a ni.

Aizawl FC lamin Chhinga Veng hneh turin vanneihna an mamawh a, he mi hmaa Chanmari FC leh BVT te an hneh tawh loh avangin K. Malsawmkima hote hi point chhuhsak theih an ni tih a chiang.

Zaninah erawh Bright Middleton Mends a dam tawh a, Ghanaian striker hian MPL-a goal khungtu zingah a hming ziah luh a tum dawn.

AFC assistant coach Lalruatdika chuan, "Dinthar laka kan record thlirin zuam ngawt theih an ni lo. MPL-ah chuan eng team pawh kan intum tawk fu zel. Hei vang hian Dinthar lakah kan
ṭhat theih dan berin kan inrem ang," tiin chak loh an tum loh thu Vanglaini palai a hrilh.