BVT sang zel, AFC hniam zel

23rd September, 2016

"A sang zel dawn, a sang zel dawn, BVT FC," tiin Lammualah Bethlehem Vengthlang FC fans an zai rual - Aizawl FC-in hniam lam an pan zel thung.

Mizoram Premier League hmahruaitu chu Bethlehem Veng^-thlang FC an ni a, Lalbiaksanga Colney hoten a chung bera awm turin champion lai Aizawl FC chu 1-0 in an hneh.

I Day Football-a mualpho Bethlehem VT-in MPL-ah hneh loh an la tawng lo. Nimin tlai Lammuala inkhelah BVT tan Lalrammuanpuia'n (Apuia) minute 65-naah goal awm chhun a khung.

I Day Football leh MFA Super Cup champion AFC chu ni thum chhungin vawi hnih an chak lo.

Attacking Football

Aizawl FC-in Chanmari FC an hneh loh hnuah point thum hmuh ngei an tum a, 4-4-2 formation hmangin Bright Middleton Mends leh F. Lalremsanga te tlar hmaah dahin goal khung ngei an tum. BVT FC lamin Aizawl FC player-te an chau tih an hria a, tlarhnung rem phui aiin goal khung an ngai pawimawh zawk.

MPL-ah foreign striker Mends-a'n tualchhung player aia a ṭhat bikna a lantir thei lo a, first half hun ṭha neih ṭha hlahtu Ghanaian forward hi second half ṭantirhah William Lalnunfela'n a thlak a, Kolasib tlangval pawh goal hmaah a hriam bik lo.

Aizawl FC-in goal khung an tum luatah an tlarhnung a pawp nasa a, BVT-in Laldingngheta tlan chakna hmangin vaw let ṭhin mah se AFC keeper Zothanmawia tana dan harsa tur khawp a awm ṭhin lo.

Aizawl FC-in inkhel thunun mah se goal chance erawh BVT-in an ngah zawk a, penalty area pawn chiah aṭanga freekick vawi hnih an hmuh chu Zosangkima'n a hmang ṭangkai thei lo ve ve.

Goal khat a tawk

Second half-ah AFC bawkin bul an ṭan fuh a, Rohmingthanga'n minute 55-naa a hun ṭha neih chu goal zawnah a pet lo. AFC player-te an chau tih a lang a, goal hmaa an hriam loh ang thoin tlarhnung lama tawnhriat nei ṭha rual pawh an chesual fo bawk.

Minute 65-naah BVT hun a thleng a, Dingngheta ball vawrh luh chu PC Zosanga'n forward Apuia tan siamin Armed Veng South tlangval hian goal kilah tak chiang takin a pet lut.

Aizawl FC-in sût tumin nawr lêt na mah se counter attack hmangin BVT an hlauhawm a, Lalrinsanga leh substitute Lalrammawia ten goal an khung belh thei lo. BVT midfielder Sangkima'n goalline aṭangin goal tur a pet chhuak bawk.

AFC an ṭha tawk lo

Aizawl FC-in Brandon VL Remdika leh Albert Zohmingmawia te inhliam vangin an chhawr thei lo a, damlo chungin Rohmingthanga khelh luihtir a ni bawk.

AFC coach K. Malsawmkima chuan, "Kan squad a chhah tawk lo a, bench aṭangin inkhel thlak danglam thei tur player luhtir tur ka nei lo. Season
ṭantirh khan hemi chungchang hi kan sawi tawh a, player naupang zawk rin a ṭul. Tun dinhmunah erawh kan academy chhuakte khelhna hun pe mah ila, danglamna an thlen thei lo a ni," a ti.

Chak phu BVT

BVT coach BS-a chuan, "Tun ṭum chu chak kan phu zawkin ka hria, minute 90 chhung khan AFC aiin kan khel ṭha zawk a ni. First half-ah khan kan midfielder-te an che thei lo a, kan tum angin kan khel thei lo. Second half-ah erawh kan insiamṭha hretin ka hria a, kan khelh danah ka lawm khawp mai," tiin Vanglaini palai a hrilh.

Match li khelh aṭanga point 10 hmu thei BVT hi MPL-a bul an ṭan ṭhat ber ṭum a ni. Khelmuala an hun tawn mek hun hlimawm zawka chantir turin veng mipui ṭawiawmna
ṭha zawk erawh an mamawh hle.

Tute nge inlan?

Aizawl FC (4-4-2) : Zothanmawia; Lalrinzuala Khiangte, Lalṭhakima (Lalawmpuia Hnamte 71'), Lalramchullova, Ricky Lallawmawma; Rohmingthanga, H. Lalbiakthanga, B. Zoramthara; Rochharzela (Jonathan Lalrawngbawla 73'), Bright Middleton Mends (William Lalnunfela 46'), F. Lalremsanga.

BVT (4-4-1-1) : Malsawmdawngzela; Hmingthanmawia, H. Lalhlimpuia, Laldinpuia, K. Lalmalsawma (Lalthanzama 70'); Laldingngheta, Lalmawizuala (R. Lalrammawia 58'), Zosangkima, R. Lalrinsanga; Lalrammuanpuia, PC Zosangliana (Lalrintluanga 88').

ZoFooty Statistics

Aizawl FC 0 - 1 Bethlehem VT

BVT : Lalrammuanpuia, 65'

MoM : Lalrammuanpuia, BVT

56% Ball Posession 44%

12 Shot(s) 12

7 On Target 8

1 Yellow Card(s) 0

0 Red Card(s) 0

Powered By Rainbow Multibrand

Mobile Showroom