Kan hmalam hun hriltu tur a ni - Zo United coach

Zanin dar 7:00 hian Chanmari West FC leh Zo United te Lammualah an inkhel dawn a, inkhel result hian club pahnih hmalam hunah nghawng lian tak a nei ang.

Chanmari West-in Din-thar FC sawpin point thum an hmu tawh a, MPL5-a goal la khung lo awmchhun Zo United-in point khat chiah an la hlawh chhuak. Zanina chak zawk tan semifinal kawng zau taka a inhawn theih laiin point hmu lo tan erawh relegate lo tura insiamṭhat leh phawt a
ṭul dawn a ni.

Striker ṭha?

Zo United-in season
ṭantirh lamah an player hlui Jesse Laldinpuia an lalet a, khelmual sira khel ṭhin hi che rang viau mah se a len bik loh avangin tlarhmaa a maltlat na lamah a mal lutuk ṭhin. Coach Vanlalrova'n loan hmangin Zo United-a khel tawh ṭhin tho Chhanrinpianga a lalut leh a, goal an la khung miau loh avangin Champhai tlangval hi mamawh chhanna a la ni lo.

Zo United-in result ṭha nei turin goal khung thei player mamawh an nei a, October thlaa transfer hun a inhawn dawn chauh avangin an neih sa player an tah hriam a ṭul. Rova tana thu lawmawm chu hun rei tak inhliam tawh Lalnunsanga'n (Talea) training a zawm leh tawh a, Armed Veng South tlangval hian MPL4-ah Chanmari West tan goal hnih khungin zanin hian a club hlui hmachhawn turin second half lamah a luh besei a ni.

Vanlalrova chuan, "Chanmari West laka kan result hian kan hmalam hun a hril ang. Kan chak a nih chuan table chung lamah kan insawn chhoh theih hmel a, hei vang hian kan chak ngei ngei a ṭul. Ka player-te pawhin kan inkhel pawimawh zia an hria a, Pathian zarah kan chak turah ka ngai," tiin a inrintawk hle.

Aizawl FC an hneh loh ṭumin Rova'n wing back R. Lalnuntluanga chu hun tawp lamah goal nawr turin a sawn hma a, Zo United captain hi tlarhma lamah tal na viau mah se Chanmari West winger
ṭha dang turin a hna ngai a chelh leh ang.

Kan phûr - Zara

Chanmari West FC-in an match hnuhnung berah Dinthar FC 4-0 in an hneh a, coach HC Zarzoliana chuan, "Kan chak avangin team kan phur a, kan chhawm nun zel a ṭul a ni. Zo United hi kan elpui an nih avangin kan hneh ngei ngei a ngai a ni," tiin point thum pawimawh zia a hre chiang.

West Warrior winger R. Laldan-mawia'n hattrick a siam tawh a, captain Laldampuia'n goal ropui a khung tawh bawk. Chanmari West boss Zara'n a winger te chungah rinna a nghat ngam tih sawiin, "Zo United midfield laia awmte hian thiam takin tlarhnung an pui ṭhin a, kan team-ah erawh an khelh dan hi kan buaina tur a ni lo. Kan winger-te an ṭha a, khelmual sir aṭangin kan nawr ang," a ti.

Club pahnih enkawltute ṭawngkam aṭangin an inhlau lo ve ve a, chak tuma an khelh ve ve dawn avangin inkhel a hmuhnawm ang.

Zo United hi Lily Veng cultural club-in an ṭawiawm ṭhin avangin thawm an nei
ṭha ṭhin a, Dinthar an sawp ṭuma ṭantu nei pangngai tawh Chanmari West-in zaninah ṭantu an nei ṭha lehzual ang.