Subroto Cup Mizoramin UP sawp

Nimin tlai khan Subroto Cup U14 champion lai Mizoram chuan Dr. Ambedkar Stadium, New Delhi-ah Uttar Pradesh chu 4-0 in an sawp.

Mizoram aiawh a kal Govt. Kolasib Middle School tan hian Lalnun-sanga chuan goal hnih a khung bakah Abraham Biakthangliana leh Remsangpuia ten goal khat ṭheuh an khung bawk. Mizoram hian an match hmasa zawkah Hmangaihsanga leh Lalsangpuia te goal hmangin Meghalaya 2-1 in an lo hneh tawh a, vawiin chawhnu dar 2:00 hian Navodaya an hmachhawn leh ang.

Nimin Pool C inkhel dangah Meghalaya chuan Navodaya hi 2-1 in an hneh a, UP hian an match hmasa zawkah 3-0 in Mizoram khingpui tur hi an lo hneh tawk bawk. Chak la nei lo Navodaya hi Mizoram tan hneh harsa an nih a rinawm lo a, head to head en tur a nih bawk avangin champion lai hi hian knockout stage an lut chiang tawh.

Mizoram team coach Lalthawmmawia chuan, "Kan nauten an match hmasa berah beisei phak lo deuh mah se vawiin chu kan ṭhat dan takin kan khel chhuak thei tawh a, beiseina pawh kan nei sang ta hle. Mizo mipuite ṭawngṭai puina kan ngen a, a sang thei ang ber thleng turin kan bei ang," tiin Vanglaini palai a hrilh.