Real Madrid leh Zidane an chelh

La Liga-ah a zawna match 17 chhung hnehna chang thei hmasa ber ni thei dinhmuna ding Real Madrid chuan an hun-ṭha an chhawr ṭangkai thei lo. Zinedine Zidane-a nau--te hi Nilai zan khan an mi-khual Villarreal nen 1-1 in an in-hnehtawk. Inkhel dangah champion lai Barcelona chu Atletico Madrid-in an chelh bawk.

Ramos goal hnih?

Santiago Bernabeu-a inkhel-ah Gareth Bale, Karim Benzema leh Cristiano Ronaldo ten inkhel bul ṭan ṭhap mah se minute 90 chhunga langsar ber chu captain Sergio Ramos a ni thung.

Spain defender Ramos hian first half tawp hma chiahin Bruno Soriano ball petin a hmai a per tur nia lang chu a kutin a dang a, referee-in penalty a chawitir. Villarreal midfielder Bruno hian goal-ah chantir zuiin a team hma a hruai pui.

Ramos hian tun season inelna hrang hrangah match sarih a khelh aṭangin ṭum thum penaty a chawina a ni. Mahse, Second half minute thumnaah Ramos-a'n a tihsual hliahkhuh nan corner aṭanga ball lo kal chu tauh lutin an siphurh a sut.

Zidane a naute hian season hmasa tawplam nena chhiar zawmin kartawpa Espanyol an hneh khan La Liga-ah a zawna vawi 16 hnehna changin kum 2010-11 season-a Pep Guardiola enkawl Barcelona-in chak zawn rei record an lo siam tawh chu an nih rual a - an khum thei rih lo thung.

Real Madrid manager Zidane chuan, "Bul kan ṭan ṭha lo a, tun ṭum hi a vawi khatna chauh pawh a ni tawh lo. A umtu zawka ṭan chu thâ a hehin a hahthlak bik em em a, ka ngaihdan chuan a tir aṭang khan kan khingpuite kha kan nawr nghal tur a ni," tiin a naute an khelh ṭhat tawk loh thu a sawi.

Zidane chuan sawi chhun-zawmin, "Football-ah chuan tihsual chu a awm thei a, tihpalh a nih chuan ven theih a ni lo. Kan tihsual hnua kan insiamṭha thei kha ka lawm a, tunah chuan kan inkhel leh tur kan thlir tawh ang," tiin a sawi.

Barca an chelh

Real Madrid nena an inkar tihzimna hun ṭha nei mah se Barcelona an ṭang tlang zo lo a, an mikhual Atletico Madrid nen 1-1 in an inhnehtawk. Catalan club hian point 10 hmuin league table-ah pathumna an ni a, an chungah hian Real Madrid (13) leh Sevilla (11) te an awm mek.

Khawvela tlarhma inkawp fuh bera sawi Lionel Messi, Luis Suarez leh Neymar ten Nou Camp-ah an mikhual Atletico tlarhnung an su pawp zo lo a, goal ven thiam hmingthang Diego Simeone-a'n a naute a rem khawm phui ṭha hle tih a chiang.

Barca hian season hmasa Champions League semifinal aṭanga pet chhuaktu Atletico lakah ball possesion 71% zet changin minute 41-naah captain Andres Iniesta thawhrah sengtu Ivan Rakitic-a'n goal hmahruai a khung a, mikhual tan Angel Correa chuan minute 61-ah an siphurh sutin point an insem.

Eng nge an sawi?

Atletico Madrid coach Simeone chuan, "Nou Camp-a goal chhuah hnua point hlawhchhuah leh theih hi a chhe lo. Hmunruak insiam tumin kan bei nasa hle a, hun tawp dawnah khan Fernando Torres leh Antoine Griezmann te kha vannei deuh sela chu chak thei kan ni," tiin a sawi.

Barca boss Luis Enrique chuan, "Goal khat aia tam khung kha chu kan tum, mahse kan khingpui te khaan ṭan khawng tlat avangin tih theih kan nei bik lo. Khawvela goal nawr na ber ni mah ila Atletico kha goal ven thiam berte zinga mi an ni ve thung," tiin a sawi.