Juventus an tlu rei lo

Champion lai Juventus chu Inter Milan lakah chesual zeuh mah se an league match khelh leh hmasa berah an tho leh nghal. Juve hian Nilaini zan khan an mikhual Cagliari chu 3-0 a sawpin Italian Serie A hmahruaitu an ni leh ta.

Turin-a inkhelah Massimiliano Allegri chuan Inter laka bench-a a ṭhuttir striker manto Gonzalo Higuain chu bul a ṭan tir. Goal khung hmasa bertu erawh Daniele Rugani niin season hmasa Serie A top scorer Hinguain-a'n an goal hnihna leh tun season-a a league goal lina ni bawk a khung.

Nipui transfer laia Barcelona aṭanga Juve zawmtu Dani Alves chuan tun hma lama a lo tih fo tawh angin penalty box pawn aṭangin kawh zetin an goal thumna a khung ve bawk. Brazil international tan Juve a zawm hnua a club thar tana a goal hmasa ber a ni.

Juve manager Allegri chuan, "Vawiin chu ka nau ten an khel
ṭha hle a, 2-0 a nih hnu kha chuan hahdam takin kan khel thei tawh. Tuna kan zir hmabak hmasa chu ngelnghet taka inkhel thunun tum a ni. Tlarhma lamah zawhna kan dawng hnem a, ka ngaihdan chuan Mario Mandzukic leh Higuain te hi an la khel dun thei ang," tiin a sawi.

Icardi a vul zel

Juventus laka goal khungtu Inter Milan captain Mauro Icardi-a'n goal khung a chawlhsan thei rih lo. Argentina forward hian Empoli lakah goal hnih khung lehin 2-0 in hnehna a chanpui.

Kum 23-a upa Icardi hian tun season-ah league-ah bik goal ruk a khung der tawh a, heng a goal khung zinga pali chu a tauh luh a ni a, a lu a hmang thiam takzet.

Icardi chuan, "Inter hian player ṭha kan neih sa bakah nipui lai khan player tawnhriat nei ṭha leh chhawrtlak kan lalut a, kan zir anga kan khelh chhuah theih tak avangin khelmualah a rah kan hmu ta," tiin a sawi.

Inkhel dangah AS Roma tan Manchester City striker hlui Edin Dzeko chuan goal hnih khungin Crotone 4-0 in an hneh. Udinese leh Fiorentina te chu 2-2 in an inhnehtawk bawk.