United an tho ve ta

Match thum chhung a zawna an chak loh hnuah Manchester United-in chak result an hlawh chhuak ve ta a, Nilaini zan khan EFL Cup last 16 lut turin Northampton Town chu khualmualah 3-1 in an hneh. Jose Mourinho-a nauten hnehna an chan theih nan League One club keeper Adam Smith puihna an mamawh.

United tan midfielder Michael Carrick-a'n kum 23-a upa Smith-a back pass a man avanga ball kal zelah goal hmahruai a khung a, League One club-in Alex Revell-a penalty hmangin an si phurh an sut. Mahse, second half-ah United tan Ander Herrera-a'n goal a khung ve leh a, Northampton keeper chet­sual vang bawkin sub­stitute Marcus Rash­ford chuan an chakna a nemnghet.

Manchester United manager Jose Mourinho chuan, "Hnehna chan kan phu a, ka beisei ang chiah a ni. Inkhel ṭantir lam minute 35 kan thunun hnuah inkhel tawp lam minute 25 kan thunun leh a, game kha kan thuhnuaiah kan dah a ni," tiin a naute khelh dana a lawm thu a sawi.

Sam Hoskins laka Daley Blind a foul hnuah United-in penalty an chawi a, referee sawisel hrat tak Mourinho chuan, "Referee chungchang sawi fo mai hi ka sim a ṭulin ka hria a, penalty a nih leh nih loh chu inngaihtuah turah dah mai ila a ṭhat zawk ka ring," tiin amah kawmtu media a chhang.

City an kal zel

United chak zanah Manchester City pawhin Pep Guardiola-a hoin hnehna an chang a, Swansea City khelmualah 2-1 in an chak. City-in goal khung turin second half an nghah a ngai a, Gael Clichy leh Aleix Garcia ten goal khat ve ve an khung.

Mualneitu lamin an club player manto ber Borja Baston hmangin vawi tam hun nei mah se pound maktaduai 15 man striker hian a hun ṭha neih a chhawr theih ṭhin loh avangin injury time-a Gylfi Sigurdsson goal khungin Swans a chhan thei lo.

City chak aia sawi hlawh zawk chu captain Vincent Kompany a ni. Belgian centre-back hi thla nga chhung hliam vanga kan hmuh tawh loh hnuah khelmualah a lo kir leh a, injury time-ah City-in substitution an hmang zo tawh chungin hliam vang bawkin a chhuak.

City manager Guar­diola chuan, "Vincent hi enfiah mek a ni a, kan tih theih chu a result nghah hi a ni. Hliam na tak a nih loh hram ka beisei a, zaninah pawh rei tak a inkhelh loh hnuah inlan mah se ṭha takin a khel thei a ni," tiin Kompany dam ṭhat chu club tan a pawimawh thu a sawi.