London club an chak

Premier League-a an match hnuhnung pathuma goal 11 chhuahtu West Ham-in League Two club Accrington Stanley laka hnehna chang turin injury time minute ruknaa Dimitri Payet freekick hmangin 1-0 in hnehna an chang hram.

Hammers boss Slaven Bilic-a'n league-a Watford 4-2 a hneh lo team aṭangin player pasarih a siksawi a, Alvaro Arbeloa leh Edimilson Fernandes te chuan London club tan an match hmasa ber an khel. Slaven Bilic chuan, "Awlsam zawka hnehna chan kan inbeisei a, goal khung tura injury time nghah thlen a ngai kha inenfiah kan mamawh a ni," a ti.

Spurs an chak

London club dang Tottenham Hotspur-in League One club Gillingham laka hnehna chang turin harsatna an tawk lo a, an mikhual hi 5-0 in an sawp. Spurs tan Christian Eriksen-a'n goal hnih a khung hnuah Dutch striker Vincent Janssen, Josh Onomah leh Erik Lamela te chuan goal khat ṭheuh an khung ve leh a ni.

Spurs boss Mauricio Pochettino-a'n Sunderland laka 1-0 a chak team aṭangin player 11 a siksawi a, kum 18-a upa defender Cameron Carter-Vickers leh kum 20-a upa midfielder Harry Winks te chuan Spurs tan a vawi khat nan inkhel bul an ṭan. Tottenham boss Mauricio Pochettino-a'n Lionel Messi naupan lai min hriat chhuahtirtu tiha a sawi kum 17-a upa Marcus Edwards pawh minute 75-naah khelmual chhungah a tlan lut.

Black Cats tan Paddy

Premier League-a chak hmel la hmu lo Sunderland-in EFL lamah chak result an hlawh chhuak a, Paddy McNair-a goal hnih khung hmangin Queen Park Rangers chu 2-1 in an hneh. QPR-in Sandro hmangin goal khung hmasa zawk mah se United aṭanga Black Cats zawmtu McNair-a goal hnih hmangin an chhanglet. Kum 21-a upa defender hian tun hmain senior level-ah goal a la khung ngai lo!

Southampton-in Premier League lama an result duhawm chhunzawmin Crystal Palace chu 2-0 in an hneh. Saints tan striker Charlie Austin chuan kar khat chhunga a goal lina penalty aṭangin a khung a, midfielder Jake Hesketh chuan a belhchhah ve leh bawk.

Inkhel Results

Queens Park Rangers 1 - 2 Sunderland

West Ham 1 - 0 Accrington Stanley

Southampton 2 - 0 Crystal Palace

Swansea City 1 - 2 Manchester City

Fulham 1 - 2 Bristol City

Northampton Town 1 - 3 Manchester United

Tottenham Hotspur 5 - 0 Gillingham

Stoke City 1 - 2 Hull City