I Day Football 2016 Semifinal Rematch

Kumin August 12 tlaiah Ram­­hlun North FC-in I Day Football final an lut a, Vanlalthlamuana leh MC Mal­sawm­zuala te goal hmanga an hneh Chanmari FC erawh an tum ram an thlen zawh loh avangin player-te'n thinrim
ṭuna khelmual an chhuahsan bak­ah an supporter-ten zawi hnawkin Lammual an chhuah­san bawk.

Vawiin tlai dar 2:30 hian Chan­mari FC-in anmahni ang bawka hneh loh la tawng lo Ramhlun North FC an hmachhawn dawn a, champion lai Aizawl FC hneh zo hlim Chanmari hian MPL kai thar lakah phuba lak an tum ang.

Sawmfela hun?

Chanmari FC forward Mal­sawm­fela'n Dinthar FC lama goal a khung theih loh hnuah Chhinga Veng FC leh Aizawl FC lamah goal a khung leh tawh a, Ramhlun North tlangval hi tun aia la ṭha thei a ni nachungin khelmual chhunga a chet danah amah rau rauah a fitness ṭhat lai berah a ngaih theih.

Ramhlun North coach Lalruat­liana Sailo chuan, "Sawmfela hi player ṭha tak a ni a, amah ringawt kan ven chuan kan inkhelin a tawrh phah a hlauhawm. Chu­vangin keini chuan team game kan khel dawn a, player pakhat veng turin team ka rem lo ang," tiin Vanglaini palai a hrilh.

I Day Football semifinal-ah khan Ramhlun North tlarhnung tan Sawmfela a hnawksak a, goal pawh khung mah se amah ang bawka goal khungtu MPL kaithar forward Thlamuana leh MC-a te an langsar zawk. Vawiin tlaiah erawh uluk taka ven a nih loh chuan Sawmfela hian goal a khung leh mai a rinawm a, Ramhlun North tlarhnung an dam kim loh bawk avangin Chanmari goal nawr a hmuhnawm ang.

Awmze neiin

Ramhlun North-in I Day Football-ah tualchhung football ngainatute an barakhaih a, player langsar fal nei lo chung pawhin awmze neia football khelh a nih chuan result ṭha tak a awm thei tih an lantir tawh.

MPL-ah pawh Lalruatliana Sailo (Tawia) game plan a hlawhtlinna a lang chho zel a, Zo United an hneh hnuah Bethlehem VT an draw leh tawh. Chanmari FC an hmachhawn hun hi fiahna tak tak an tawn hmasa ber tur a nih hmel a, inkhel pawh a hmuhnawm ngei tura ngaih a ni.

Chanmari FC manager Mawi­tea chuan, "Kan coach game plan hi kan ring tawk a, a hnuaiah hian result ṭha kan neih chhoh zel ka beisiei. Tun season-ah vawi hnih kan chak lo tawh a, kan hneh loh pakhat zawk Aizawl FC chu kan hneh leh tawh. Ramhlun North pawh hi hneh ve leh ngei kan duh," tiin phuba lak theih an inbeisei thu a sawi.

MPL-a champion ngei tum Chanmari FC hian an coach duh tak Lalsangzuala Hmar an lalut a, a duh ang zawng player an chhawp chhuah sak bawk. Hei vang hian coach leh player ṭha awmna Chanmari FC hi chak zawk tura ngaih an ni a, amaherawhchu Tawia nauten an khelh dan an bel ṭhat avangin result hriat lawk theih a ni lo.

Entu lam

Chanmarians supporter-ten Lammualah thawm an nei leh tawh a, Aizawl FC lama ring taka 'Shabash Hallelujah' sa tute khan vawiin tlaiah pawh inkhel an en leh ngei ang. Hei erawh hriat tel a ṭha a, tun season-ah Chanmari FC aiin Ramhlun North-in ṭantu an nei ṭha zawk a, zaninah erawh entu ngah tur zawk a hriat loh.