AFC Cup Semfinal-ah Bengaluru

I League champion Benga-luru FC-in India mai ni lo Asia khawmualpuiah pawh an ṭha tawk tih pholangin AFC Cup semifinal an lut a, inkhel pahnih belhkhawmah Tampine Rovers chu 1-0 in an hneh.

Bangalore club hian first leg-ah Singapore club hi mikhualin CK Vineeth-a goal khung hmangin hnehna an chang a, khualmualah team pahnihin goal an khung theih loh avangin Bengaluru hi a tlang zawkah an ṭang ta a ni.

Beisei lawk ang ngei-in mual-neitu team-in Jermaine Pennant, Jordan Webb leh Billy Mehmet hmangin hun ṭha vawi tam nei mah se Bengaluru an
ṭang tlang a, Dempo SC leh East Bengal hnua Indian club AFC Cup semifinal lut hmasa ber an ni ta.

Albert Roca enkawl team hian semifinal-ah champion lai Johor Darul Ta'zim an hmachhawn ang a, September 28-ah first leg khelin October 19-ah second leg khelh tur a ni thung.

Bengaluru coach Roca chuan, "Game harsa tak kan khel a, khual-mualah player ṭha tak tak hmachhawn mah ila he chona hmachhawn tur hian kan inpuahchah lawk a ni. Kan match pahnih kha kan thlirkir chuan team chungnung zawk kan ni a, semifinal luh hi kan phu a ni," a ti.

Singapore-a inkhelah bul ṭan tura beisei Lal-chhuanmawia Fanai chu hliam vangin hruai tel a ni lo a, Lengpui tlangval hi a khup hliam Mumbai-ah enfiah niin thla khat tal a chawl ang. Mizo tlangval zingah Lalthuammawia Ralte, Daniel Lalhlimpuia leh Beikhokhei Beingaichho ten bench lamah hun an hmang tluan a, Chaltlang rawlthar Malsawmzuala chu second half-ah tlan luhtir a ni thung.