Messi-a'n Pele record a khum

Barcelona-in Thawhlehni zan khan La Liga inkhelah Real Valladolid 3-0 in an hneh a, Catalan club tan hian Clement Lenglet, Martin Braithwaite leh Lionel Messi ten goal khat ṭheuh an khung.

Argentine forward Messi hian Barca tan goal 644 a khungna a ni a, club pakhat tana goal khung tam ber record Pele siam chu a khum. Tun season-ah Messi a che ṭha tawk lo a, chuti chung chuan a football zinkawng ropuina erawh a belhchhah zel.

Khawvel player ropui ber tiha mi ṭhahnem takin an chhal Pele hian an ram club Santos tan season 19 chhungin goal 643 a khung. Football legend Pele hian Santos tan hian kum 1956 aṭanga 1974 thleng a khel a, career tawp lamah New York Cosmos tan kum thum a khel. 

Pele hian a vanglai hun zawng zawng Santos tan a khel a, goal khungtu ropui a nih bawk avangin a record chhuanawm zet hi khum theih loh ang hiala ngaih a ni.

Brazilian forward hian kum 16 a nihin Santos tan a khel ṭan a, kum khatnaah goal khat chauh a khung. Amaherawhchu hemi hnu season 18-ah erawh goal 10 khung tlin loh season vawi khat chauh a nei a, kum 1971 khan goal kua a khung.

Pele hian season khata goal 50 aia tam khung ṭum nga a nei a, European club tam tak sawmna a hnawl avangin Santos tan a vanglai hun zawng zawng a hmang a, goal a khung tam bawk avangin a record hi khum thei an awmin an ring lo hial a ni.

Barcelona-in kum 2001 khan Argentine naupang Messi chu an club-a inzir turin an lalut a, risk an la huai hle. Catalan club hian Messi thiamzia an hmuh hmaih lo a, amaherawhchu a rualpui zingah a te fal. Growth hormone a thlak chham avangin Messi enkawl nan hian thla tin $1,000 sen a ngai a, Argentine club lian River Plate pawhin duh hle mah se Argentina sum dinhmun thlak chhiat lai a nih avangin an la lut thei lo.

Messi-a'n football zirna duhawm ber zinga mi La Masia a zawm a, 1987 Batch-ah hian Cesc Fabregas leh Gerard Pique te nen awm hoin Spanish rawlthar thiam bik zingah pawh a la thiam fal cheu. Barcelona-in an risk fuh a, Messi hian kum 17 leh ni 22 a nihin senior team tan a khel ṭan.

Argentine forward hian season hmasa ber 2004-05 season-ah goal khat chauh a khung a, season hnihnaah goal riat khungin hemi hnu hi chuan a hawi kir tawh lo. Messi hian 2008–09 season aṭang khan goal 30 aia tam a la khung ziah a, tun season-ah pawh a che ṭha lo tiin sawisel mah se goal 10 a khung tawh tho.

Messi hian season khata goal 50 khung tlin vawi ruk a nei a, a khung tam ber season-ah phei chuan goal 73 a khung hial. Tun hnaiah club nen a boruak a ṭhat loh avangin 'one-club man' a ni zel ang em tih a sawi thei lo a, amaherawhchu season 17 chhung senior team-a a khelh tawhna record hi chu khum a harsa dawn.

Kumin nipui bazarah Lionel Messi hi chhuak tura sawi a ni a, chhuak ta se chuan Pele record hi a him dawn. Amaherawhchu Barcelona-in an club legend hi an chelh leh hram avangin Pele record khumin a awm ta.

Footballer tan club pakhata season 15 chuang khelh a harsa a, Messi record khum tur chuan season 15 chhung ṭha taka khelh a ṭul dawn. England striker hlui Gary Lineker-a'n a khum harsat dan hi a sawifiah thiam hle.

Linekar chuan, "Lionel Messi chuan Barcelona tan goal 644 khungin club pakhat tana goal khung tam ber record Pele siam chu a khum. Record khum theiha an ngaih loh kha khumin a awm a, an khum nawn tawh lo ang. Messi record khum tur an awm a nih chuan season 15 chhung chawhrualin goal 43 khung ziah a ngai dawn a, club pakhat tan kheh a ngai bawk," tiin khum thei an awm rin tawh loh thu a sawi.