Man City-in Arsenal an sawp

League Cup quarterfinal-ah champion lai Manchester City chuan Thawhlehni zan khan Emirates Stadium an luhchhuah a, Arsenal lakah 4-1 in hnehna an chang. 

Man City tan Gabriel Jesus-a'n minute thumna leka a khung chu Alexandre Lacazette-a'n Gunners tan minute 31-naah sut mah se team ṭha zawk Pep Guardiola hoten chak turin harsatna an tawk lo.

Second half-ah Riyad Mahrez (54'), Phil Foden (59') leh Aymeric Laporte (73') ten Man City tan goal khat ṭheuh an khung belh a, semifinal an lut.

Arsenal boss Mikel Arteta chuan, "Goal kan chhuah hma a, kan goal chhuah dan a ho bawk. Ka naute an tho chhuak a, goal ṭha tak khungin siphurh kan sut. Minute 25 chhung chu team ṭha zawk kan ni hial. Result pawm thiam har tak a ni," tiin mualpho taka chak lo tur an nih loh thu a sawi.

Man City manager Pep Guardiola hian assistant atan Arteta hi a hmang ṭhin a, hnehna an chan zawhah a ṭhianpa tan a ṭawng chhuak nghal. 

Spanish manager Guardiola chuan, "Arteta chungah hian rinna an nghah ngei ka ring. An ban a nih chuan an tisual khawp ang. Amah hi ka hrechiang a, manager theihna nei sang tak a ni," tiin a sawi.

League Cup quarterfinal inkhel dangah Champonship club Brentford-in Newcastle United an barakhaih a, 1-0 a hnehin semifinal an lut ve bawk.