FC Goa-in Jamshedpur an hneh

Nilaini zan Indian Super League inkhelah FC Goa chuan hun pek belha Igor Angulo goal khung hmangin Jamshedpur FC chu 2-1 in an hneh a, point thum hlu tak an hlawh chhuak.

JFC tan Stephen Eze chuan minute 33-naah goal hmahruai khung zet mah se Igor Angulo hmangin Goan club-in an chhanglet a, Spanish striker hian hun pek belh minute nganaah chakna goal a khung zui bawk. 

Jamshedpur tan Laldinliana Renthlei, Ricky Lallawmawma leh Isaac Vanmalsawma ten inkhel bul an ṭan a, Goan club lamah Mizo player an awm lo thung. 

Thawhlehni zan khan Odisha leh NorthEast United chu goal hnih ve ve khungin an inhnehtawk bawk a, minute 23-naa Odisha tana Diego Mauricio goal hmahruai khung chu Highlander hian Benjamin Lambot leh Kwesi Appiah (penalty) hmangin an chhanglet a, an phur hle.

Mahse, tun season-a chak la nei lo Odisha tan Cole Alexander Appiah penalty lawma Highlander fan-te hlim authawm pawh a reh fel hmain goal a rawn khung leh a, hun tawp thlenga goal dang lut loin team pahnih hi 2-2 in an ṭin.

NorthEast United tan Lalrempuia Fanai leh Lalengmawia ten inkhel bul an ṭan a, Odisha tan Jerry Mawihmingthanga chuan bul ṭanin, Daniel Lalhlimpuia chu bench aṭanga luhtir a ni bawk. 

Odisha FC    2 - 2    NorthEast United

Jamshedpur FC    1 - 2    FC Goa