Mourinho chungah Galatasaray an lawm lo
'The Special One' hming lem an pek, a kalna hmun apianga thawm nei ve reng, Jose Mourinho-a'n Turkey lamah pawh chanchin ngaihnawm hriat tur a nei leh ta - Portuguese manager chungah Galatasaray an lawm lo hle.
Thawhṭanni zan khan Turkish Super Lig-ah team pahnih hi an intawng a, 0-0 in an ṭin. Inkhel a zo a, boruak erawh a la tawp lo. Galatasaray chuan Mourinho hi chi inthliarna lam hawia ṭawng chhuakah an puh.
Hei vang hian Galatasaray chuan Mourinho lakah thubuai siam an tum thu an sawi a, he thu buatsaih a nih thleng hian Fenerbahce lamin thuchhuah an la siam rih lo.
Buaina hmasa
Fenerbahce leh Galatasaray hi Turkish Super Lig lamah an inum na a, Galatasaray hian table chung ber luah mekin, point 64 an nei a, Fenerbahce hi pahnihna niin, point 58 an nei thung - point ruk an inkarah a awm.
Thawhṭanni zana team pahnih intawn hma daih tawh hian Mourinho leh Galatasaray striker Mauro Icardi ten khelmual pawnah boruak an nei. Turkish league-a referee sawisel peih tak Mourinho hi Icardi hian, 'The Crying One' tiin a tihel!
Icardi chet dan chungchang an zawhnaah Mourinho chuan, "Icardi hi GOAT a ni a, a ropui em avangin a chungchang sawi ka tum lo. GOAT chungchang sawi turin kei chu ka te lutuk," a ti let - Icardi hian instagram lamah thlalak hmangin a chhanglet zui.
A la tawp lo
Thawhṭanni zanah team pahnih an intawng ta a, an in draw - hetah hian a tawp mai dawn emaw tih laiin a tawp tlat lo. Team pahnih inkhel hi club pahnih ngenna angin ram pawn lam referee-in a enkawl.
Slovenian mi Slavko Vincic chu referee niin, inkhelh zawhah Mourinho hian, "Referee chungah lawmthu ka sawi. Minute khatnaah uar takin an dive nghal a, an bench lam kha zawngte ang maiin an zuang vel a nih chu!
"Turkish referee chu awm ngat se, minute khatnaah yellow card kan hmu nghal ang a, player thlak kan ngai nghal ang chu. Inkhelh zawh khan referee room-ah ka lut a, lawmthu ka hrilh. A hnuah Turkish mi, fourth official lam kha ka pan leh a, 'Referee ni ngat la chu kan inkhel kha awmze nei lo a ni hial ang,' ka ti zui," a ti!
Lawm lohna
Galatasaray chuan thuchhuah siamin, "Fenerbahce manager Jose Mourinho hian Turkey-a hna a thawh hnuah, kan ram mipuite deuna ṭawngkam a chhak chhuak fo a, zanina a thusawi phei chu a huatthla la a ni satliah lo a, inzah lohna leh awmze nei loa indeuna a ni," an ti.
Turkish club lar chuan, "Hei vang hian chi inthliarna lam hawia Mourinho ṭawngkam hman hi kan dem a, hma kan la dawn. UEFA leh FIFA-ah pawh thubuai kan theh lut dawn a ni," an ti a, "Nun dan ṭha chawisan ngaisang tak nia insawi Fenerbahce ngaihdan pawh kan ngaichang reng dawn a ni," an ti deuh kher!
Kum 62 mi Mourinho hian tun season ṭan dawn khan Fenerbahce hi a enkawl ṭan a, Turkish football-ah thawm a nei na nghal hle - chanchinthar a awm leh thuai ang.