New Zealand an chak, Pakistan an tla

ICC Champions Trophy-ah New Zealand chuan Thawhṭanni khan Bangladesh chu wicket ngain an hneh a, inelna thlengtu Pakistan tan beisei tur a awm tawh lo. Black Caps leh India ten semifinal an lut a, group A aṭanga knockout stage lut team pahnihte hian March 2, Pathianni hian group match hnuhnung ber an khel ang.

Ravindra Show

New Zealand-in an match hmasa bera Pakistan an hneh ṭumin batter chhuanvawr Rachin Ravindra an chhawr thei lo. ICC Champions Trophy hma hian Shaheens leh Black Caps hian ODI series an inkhel a, Pakistan batter Khushdil Shah ball vuakin Ravindra hmai a per a, thi a chhuah bawk avangin a chawl rih.

Kum 25 mi Ravindra hi Bangladesh hmachhawn turin a dam tawh thung. Rawalpindi Cricket Stadium-ah Bangladesh-in bat hmasak an thlang a, opener pahnih Tanzid Hasan (24) leh Najmul Hossain Shanto (77) ten bul ṭan chhe lo mah se player dangin an thlawp ṭha tawk lo.

Bangladesh hian over 50-ah 236 runs chauh siamin wicket kua an hloh bawk. New Zealand bat hun a thleng a, Will Young-a'n run a siam lo a, Devon Conway pawhin 30 runs chauh a siam.

Kane Williamson meuh pawhin run nga chauh a siam a, New Zealand dinhmun a chhe hman. Mahse, Ravindra a rawn pen chhuak a, ball 105-ah 112 runs siamin Black Caps-in ball 23 dah bangin 240/5 runs an siam a, hnehna an chang.

Engtin zel?

Group A-ah India, New Zealand, Pakistan leh Bangladesh te an awm a, match hnih an khelh tawhah Men in Blue leh Black Caps te an chak ve ve laiin Shaheens leh Bangladesh te erawhin point an hmu lo thung. Match khat chauh khelh tur a awm tawh avangin India leh New Zealand-in semifinal an lut.

Group B-ah erawh nimin khan match hmasa bera chak ve ve Australia leh South Africa te an inkhel a, semifinal lut tur a la hriat mai dawn loh. Vawiin chawhnu dar 2:30 hian England leh Afghanistan te an inkhel ang a, heta chak zawk hian beiseina thar an nei dawn.