Arda Guler dinhmun a chiang lo

Real Madrid midfielder Arda Guler hma hun a chiang lo a, kum 20 mi hi tun hnaiah coach Carlo Ancelotti nen an inhmu thiam lo nia sawi a ni - Premier League club engemaw zatin an ngaihven a, Arsenal hming pawh a ri ring hle.

Guler hian July 2023 khan Fenerbahce aṭangin Real hi a zawm a, a man hi euro maktaduai 20 a ni. A kum a la nau bakah hliamin a tlakbuak bawk a, hei vang hian season hmasa khan match 12 chiah khelin goal ruk a khung.

A minute ang zawnga chhutin season hmasa khan minute 442 khelmualah hun a hmang a, minute 74 dana goal khung zel ang a la ni phak. Tun season-ah match 28 khelin goal thum a khung a, assist vawi nga a nei.

Mahse, tun hnaiah Ancelotti-a'n squad-ah pawh a telh ngai lo a, Madrid match hnuhnung pasarihah vawi khat chiah a inlan - hei pawh Copa del Rey niin, bul ṭan mah se, minute 76-naah lakchhuah a ni.

La Liga-a an match hnuhnung paliah squad-ah pawh a awm phak lo a, Champions League-a Manchester City an hmachhawn vawi hnihah a inlan lo ve ve bawk. Kum 2025 chhung hian league-ah minute 30 chiah a la inlan!

Real-in an league match hnuhnung bera Girona an hneh zawh khan coach Carlo Ancelotti chu Guler chungchang hi zawh a ni a, Italian coach hian, "Inkhel turin a inpeih," tih zawngin a chhang.

King Carlo hian training-naah Guler hi a duhkhawp lo niin an sawi a, tlarhnung ven hna a thawk ṭha tawk loah a ngai - Turkey chhuanvawr hi a hma hun a chiang ta lo hle.

Real hian naktuk zing dar 2:00-ah Copa del Rey semifinal first leg an khel dawn a, Real Sociedad chu khualmualah an lenchilh ang. Tukin zing dar 2:00 khan semifinal inkhel dangah Barcelona-in Atletico Madrid an mikhual bawk.