East Bengal-in Hyderabad an mikhual dawn

Indian Super League pawh a hmawr bawk a hnai ve zel a, zanin dar 7:30 hian East Bengal chuan Hyderabad an mikhual dawn - Kolkata club hian playoff beiseina an la nei a, Hyderabad tan erawh beisei tur a awm tawh lo.

East Bengal hian an league match hnuhnung berah Punjab FC chu 3-1 in an hneh a, he inkhelah hian Mizo defender Lalchungnunga chuan goal khungin, player of the match-ah thlan a ni.

Durtlang tlangval hi zaninah pawh inlan leh tura beisei a ni a, Vairengte striker David Lalhlansanga an la nei bawk. David hian bul a ṭan lo a nih pawhin bench aṭang tal chuan lut turin a beisei ngam ang.

East Bengal hian beisei an la nei kan tih rualin, thilmak a thlen tel a ngai tawh - playoff khel phak china awm, parukna Mumbai City an phak lohna hi point riat a ni a, match thum chauh khelh tur an nei tawh.

Hyderabad-in beisei tur an nei lo chiang tawh a, he team hian Mizo player kawl nualin, Isaac Vanmalsawma leh Ramhlunchhunga ten hmun pawimawh an chang a, zaninah pawh bul ṭan tura beisei an ni.