Kawng dik kan zawh - Motta

Juventus coach Thiago Motta chuan sawiselna leh harsatna hrang hrang te tawk ve mah se, amah leh a team chuan kawng dik an zawh mek zel tih a sawi chhuak.

Old Lady hian Serie A nomawi an beisei ngam tawh chiah lo a, beisei phak loin Champions League aṭangin an tla - tuna an beisei theih lian ber chu Coppa Italia a ni, zanin dar 1:30 hian Empoli nen quarterfinal an khel ang.

Motta chuan, "Champions League aṭangin kan tla kha a pawi, a nghawng pawh a lian. Mahse, kan chak loh hnu kan match hmasa berah Cagliari chu kan hneh a, goal kan chhuah lo bawk.

"Season tir aṭanga khan thil tum chiang tak kan nei, nomawi chawi kan tum. Kan duh leh beisei ang vekin thil a kal bik lo tih erawh hriat a ṭha a, kan hmabak la awm hi a ṭha thei ang bera hlen chhuah kan tum ang.

"Team nghet leh hlauhawm tak nei turin vawi khatah a tih hluai theih loh, tunah chuan team nghet nei turin kang dik kan zawh mek a, hma kan sawn zel bawk ang," tiin a sawi.

Juventus hian hliam vangun Dusan Vlahovic chu an chhawr thei lo reng a, mahse tunah chuan Serbian striker hi a dam tawh, kar tawp Serie A an khelh ṭum pawhin goal awmchhun a khung, zaninah pawh hmun pawimawh a chang leh ang.