Pakuanaah Andrey Rublev

Association of Tennis Professionals (ATP) chuan world ranking thar an ti chhuak leh ta a, tun hnaia Qatar Open champion nomawi chawitu Andrey Rublev a sang zual 10 zingah a inhlangkai ve leh ta.

Russian tlangval hian a vawi hnih nan Qatar Open nomawi a chawi a, final inkhel hmuhnawmah Jack Draper 7-5, 5-7, 6-1 in a hneh a, nomawi a chawi mai bakah ranking lamah pawh a dinhmun a siamṭhat phah a ni.

Qatar Open final-a chak lo zawk Draper pawhin hma a sawn tho, mipa tennis thuneitu sang ber ATP ranking tharah hian 12-na dinhmun a luah a, tennis a khelh china a ranking san ber ṭum a ni hial.

Damdawi hman phal loh hman vanga hrem lai Jannik Sinner chu a chung berah a la awm chhunzawm, Italian tlangval dinhmun ti buai thei tur Carlos Alcaraz leh Alexander Zverev ten an hun ṭha an la chhawr ṭangkai thei bik lo a, an hnuaiah an la awm.

Italian tlangval Sinner hi thla thum chhung hrem a ni a, tun season atana Grand Slam hmasa ber Australian Open champion kha niin French Open hma hremna hi a hmang zo leh hman dawn, midang tan amah hnaihna hun a tam thei lutuk dawn lo a ni.

Serbian star Novak Djokovic chu pasarihnaah a awm - Grand Slam vawi 24 champion tawh Djokovic hian nikum aṭanga khan major title lak a la nei lo, kuminah beisei anga a la khelh chhuah loh bawk avangin a dinhmun a sang mawh rih hle.