Palace lakah Villa an chak lo

Champions League khel phak an ni satliah lo a, last 16 an lut - Liverpool chelh theih an ni bawk. Mahse, Aston Villa season hman lai hi hriatthiam an harsa, tunah chuan Crystal Palace lakah 4-1 in an tlawm leh ta si a ni.

Selhurst Park-ah mualneltu Palace chu a tir aṭanga a tawp thlenga chungnung zawk an ni. Thawhlehni zan Premier League inkhelah hian Ismaila Sarr chuan goal hnih a khung bakah Jean-Philippe Mateta leh Eddie Nketiah ten an belh bawk.

Aston Villa hian Morgan Rogers hmangin an sut ṭhen a, amaherawhchu striker Ollie Watkins vanneih zan a ni lo a, goal dang an sual chhuak thei tawh lo, mualpho takin an tlawm ta a ni.

Villa manager Unai Emery chuan, "Goal khung theihna remchang an hmuh hmasak berah an khung nghal a, a hnu lamah kan tho chhuak thei tawh lo, kan khingpui ten kan tihsual apiangah min hrem thei a nih chuan inkhelh a harsa.

"Kan chak lohna hi kan pawm thiam tur a ni a, kan lungawi tur erawh a ni lo. Hma lam pan leh nghal thei turin insiamṭhat a ngai," tiin a sawi a, kar tawpa Cardiff City nen FA Cup an khelh tur a ngaihtuah leh nghal.

Aston Villa hian Premier League match 28 aṭanga point 42 hmuin 10-na an ni mek. FA Cup bakah hian kar leh maia Club Brugge nen UCL last 16 an khelh tur an ngaihtuah tel a ngai dawn a, player an insiksawi ang.