Ruahsur vangin an khel lo

ICC Champions Trophy-ah Thawhlehni khan Australia leh South Africa te inhmachhawn tur an ni a, Rawalpindi-ah ruahsur vangin ball vawi khat pawh an vawm lo. Team pahnih hi an match hmasa berah hnehna an chang ve ve a, semifinal lut turin an dinhmun a ṭha.

Group B-ah Afghanistan hi team nem bera ngaih an ni a, nimin khan England nen an inhmachhawn. Australia-in Afghanistan an la hmachhawn dawn avangin semifinal luh theihna kawng a inhawng zau a, Proteas erawhin England an la hmachhawn dawn avangin hmabak a har thei thung. Chutihrualin England hi an chak lo erawh chuan South Africa hna a awlsam thei ang.

Group A-ah erawh India leh New Zealand ten semifinal an lut chiang tawh a, group hmahruaitu tur an la zawng dawn. Men in Blue hian an match zawng zawng Dubai-ah an khelh avangin an dinhmun a ṭha a, chutihrualin Rohit Sharma hote hi chesual ve thei tho an ni.