A zawna a vawi li nan Brighton chak

Nottingham Forest laka 7-0 ngawta an mualpho hnuah Brighton & Hove Albion an insiamṭha a, inelna hrang hrangah match li a zawnin an chak ta - Thawhlehni zan khan Premier League-ah tun season-a che ṭha tak AFC Bournemouth chu 2-1 in an hneh.

Brighton hian Forest an ngam loh hnu khan Chelsea (3-0), Southampton (4-0) leh Cherries (2-1) hmachhawnin an chak vek a, FA Cup-ah Chelsea tho hmachhawnin, fourth round aṭangin 2-1 in an pet chhuak bawk.

American Express Stadium-a inkhelah Brighton hian minute 12-na lekah penalty an hlawh chhuak a, keeper Kepa Arrizabalaga chuan Joao Pedro titluin penalty a chawi a, Brazilian striker hian Kepa bumin goal-ah a chantir.

Mahse, Cherries hian season hmang ṭha tak Justin Kluivert hmangin minute 61-naah si phurh an sut a, point hawn ngei an inbeisei - Kluivert hian tun season-ah match 29 khelin goal 13 ngawt a khung ta a, assist vawi ruk a nei bawk.

Hetah hian Brighton-in tawp erawh an tum lo. Minute 75-naah Danny Welbeck a inlar a, Manchester United leh Arsenal striker hlui hian chakna goal a khung.

Kum 34 mi Welbeck tan October 26-a Wolverhampton Wanderers laka goal a khung hnua a goal hmasa ber a ni a, tun season-a league match 20 a khelhah goal sarih a khungna chiah niin, assist vawi li a nei bawk.

Welbeck hian Brighton tan EPL bikah match 128 khelin goal 30 a khung tling ta a, Brighton tana top flight league-a goal khung hnem ber a ni mek - Pascal Gross a nih rual a, Gross hi Borussia Dortmund tan a khelh tawh avangin Welbeck hian a khum ngei a rinawm.

Brighton manager Fabian Hurzeler chuan, "Bench-a Welbeck neih chuan, 'Engtikah nge ka luhtir ang aw?' tia ngaihtuahna sen reng a ngai. A phu ang takin goal a khung a, ka tana pawimawh ber chu a team tan hruaitu a nihna hi a ni a, player naupang zawkte tan a ṭangkai em em a ni," a ti a, England tan vawi 42 inlana goal ruk khung thei striker chu a fak.

Mualneitu Brighton-in Bournemouth an hneh avangin table-ah pariatna an ni a, Cherries hi an chungah awm mah se, an point hmuh zat a inang - Brighton hian he thu buatsaih laia palinaa awm chin Chelsea chu point thum chauhin an phak lo a, Champions League an beisei ve zel.