Schumacher chunga ding Hamilton

Lewis Hamilton chu Formula 1 huangah vawi 92 zet a chak ta a, car intlansiakna sang berah hian driver hnehna chang hnem ber a ni. Vawi 91 chak thei Michael Schumacher nen record inṭawm an chelh lai chu a kalsan.

Pathianni zan khan Portuguese Grand Prix tlan niin, a hmasa ber aṭanga tlan ṭan Hamilton hian lap 66 chu darkar khat, minute 29 leh second 56 chhungin a thleng; amah hnaih bertu Valtteri Bottas aiin 25.592 seconds ngawtin a thleng hma zawk a ni.

Algarve International Circuit-a intlansiakah Hamilton a chungnung a, ropui taka hnehna a chan bakah hian championship lama a dinhmun a sawhnghet bawk - a hnuaia awm Bottas nen an inkarah point 77 zet a awm ta.

Season kal laiah intlansiak hmabak panga an la nei, world title la hnem ber Schumacher (7 titles) nih rual turin Hamilton dinhmun a ṭha tawh hle. Britain tlangval hi kum 35 mi a ni a, record ropui a hnutchhiah zel dawn niin a lang.

Mercedes chuan team radio aṭangin car chhunga awm Hamilton an be pawp a, "Mellung pawimawh i phun ta," an ti. Team boss Totto Wolff chuan, "Lewis 92, 92," tiin an driver duhlai a lawmpui thu a sawi tel nghal bawk.

Record ropui a siam a, hnehna a chan hnuah Hamilton chuan, "Tun ṭuma ka hun tawn ang hi ka suangtuah phak ngai lo, a hmunah ngei ka pa a awm theih bawk avangin ka thil tawn hi lawmna tur hlir a ni.

"Eng tiang taka ropui leh lawmawm nge a nih tih hi ka ngaihtuah phak thiam lo hial a, ka lawmna sawifiah turin ka ṭawngkham thiamin a tlin lo," a ti. Car intlanisak ngaisangtu tan chuan F1 huanga hnehna chang hnem ber nih aia thlan tur dang a tam lo ang.

Lewis-a elpui, world title pali la tawh Sebastian Vettel chuan, "Chak hnem ber nih a phu, vawi 100 pawh a chak thei ang, ani hi chu fak uchuak a awm thei lo ang," tiin lawmpuina thu a sawi. Vettel leh Lewis hi an inel tawk thei hle, tun hnaiah erawh German driver a che fuh ve thei ta lo a ni.

F1 champion hnem ber Schumacher hi 2013 December thla khan France rama vur tawlhnaah a che sual a, na takin a lu a sawh. A chetsual hnuah nikhaw hre loin a awm zui a, enkawlna ṭha tinrenga enkawl ni mah se a la dam thei lo.

German legend hian infiamna a chawlhsan hnuah Geneva, Switzerland-ah a pem a, a chenna hmunah hian damdawi lam thiam ten khawl nen an enkawl mek a ni. Neurology specialist Professor Erich Riederer chuan tun hnai khan Schumi lakah an la beidawn loh thu a sawi.

Tun dinhmunah chuan Schumacher hi Hamilton chungchang leh a record sawi thei a ni lo, engtik niah emaw chuan rawn harh chhuakin a record ropui khum a nih hi a la hre mah thei, hre loin a harh lo tlang a nih pawhin a mak lo ang.