Red Bull kan ṭha tawk - Verstappen

Formula 1 driver champion lai Max Verstappen chuan season thar a nghakhlel hle tih a sawi a, a zawna vawi nga champion thei turin amah leh an team chu an ṭha tawk tih a sawi bawk.

Dutch tlangval Verstappen hian tun hnaiah a zawnin kum li chhung chu F1 title a la tawh, season hmasa khan kum tawp lamah a che ṭha tawk lo a, champion zui tho mah se midangin an el buai thei tih a takin kan hmu.

Max Verstappen chuan, "A nihna takah chuan danglamna leh hmasawnna thlen kan tum ṭhenkhat chu a fuh vek lo a, tihsualte pawh kan nei tih kan pawm tlang. Mahse, tuna kan hmalakna ho erawh a fuh chho hle.

"Car thar kan nei a, hei hian season hmasa lam aia ṭha leh zualin inelna min hmachhawn tir theih ngei ka beisei," a ti. Red Bull team hian car thar RB21 an hmang dawn a, midang hmaa tlan theih an inring.

Verstappen hi a champion leh thei a nih chuan a zawna a vawi ngana tur a ni a, a zawna champion rei lamah driver ropui Michael Schumacher a nih rual chiah ang, kum 27 mi chauh a la nih avangin hmabak a nei êng hle a ni.

Red Bull hian Verstappen-a teammate turin Liam Lawson an la, season hmasa khan an driver pakhat zawk Sergio Perez chuan beisei a phak loh avangin nikum December thla khan an lo inṭhen tawh a, kuminah boruak thar an hip dawn a ni.

Khawvela car intlansiakna sang ber hi season thar ṭan turin an inbuatsaih mek - kumin atana intlansiak hmasa ber ni turin March 16, Pathianni hian Melbourne Grand Prix Circuit-ah Australian Grand Prix an tlan ang.