Doncic-a'n a club hlui a ngam

Luka Doncic chuan nimin zing khan Los Angeles Lakers chu hnehna a chanpui - Lakers hneh tak hi Dallas Mavericks an ni a, tun hma lama Doncic lo khelh tawhna a ni.

Kum 25 mi Doncic hian point 19 a neih bakah rebound vawi 15 lain a ṭhiante basket neih tur ṭum 12 a siamsak bawk a, a team thar Lakers tan triple-double neiin, 107-99 in an chak.

Hmanni lawk khan Doncic hian Dallas Mavericks aṭangin Los Angeles Lakers hi a zawm a, Lakers aṭangin Anthony Davis chuan Dallas a pan ve thung a, player pahnihten an khelhna an inthleng a ni.

Crypto.com Arena-a hnehna an chan hnuah Doncic chuan, "A nihna takah chuan quarter hmasa pahnihah khan eng nge thleng pawh ka hrethiam lo, engkim mai kha a liam puat puat ni ber maiin ka hria.

"Chawlhlawk hman hnuah erawh rilru a fim a, nuamti takin ka khel thei," a ti. A team hlui Dallas Mavericks a hmachhawn hmasa ber a ni a, hun rei tak a lo hman tawhna a nih avangin a boruak a danglam a ni.

Tun hnaiah Lakers hi a zawnin vawi thum an chak, an dinhmun siamṭhain Western Conference-ah pathumna an ni mek. Dallas lakah hian an thiampuipa LeBron James chuan point 27 neiin a la thawh hlawk hle.

Dallas Mavericks erawh NBA regular season kal laia a vawi 28 nan an chak lo a, Western Conference-ah pakuana an ni mek - Lakers lakah hian Kyrie Irving chuan point 35 nei mah se chak nan a tawk zo lo a ni.

Nimin zing inkhel dangah Memphis Grizzlies chuan overtime an khelh hnuin an mikhual Phoenix Suns chu 151-148 in an hneh. Grizzlies hi Western Conference-ah pahnihna an ni mek, chak lo Suns erawh 11-na an ni thung.

Eastern Conference lama team ṭha Cleveland Cavaliers chuan Orlando Magic chu 122-82 in an hneh a, tun hnaiah a zawnin vawi 10 an chak ta a, table chung berah an awm chhunzawm.

Giannis Antetokounmpo-a point 27 neih chu Milwaukee Bucks chak nan a tawk zo lo a, an khingpui Houston Rockets lakah 100-97 in an tlawm a ni.