Lazio hnehtu Inter an tlang

Coppa Italia quarter-final inkhel hmuhnawmah Inter Milan chuan Lazio chu 2-0 in an hneh a, semifinal-ah an elpui leh hmelma ni bawk AC Milan nen an intawng zui leh ang.

Inter Milan tan hian striker Marko Arnautovic chuan chawlhlawk hmain goal hmahruai a khung a, second half-ah Hakan Calhanoglu chuan penalty aṭangin an goal hnihna leh chak nemnghehna ni bawk a khung ve thung a ni.

Simone Inzaghi-a'n hliam vangin Yann Sommer, Marcus Thuram leh Joaquin Correa te a hmang thei lo a, captain Lautaro Martinez leh centre-back Alessandro Bastoni te chu hahchawlhna hun a pe bawk, harsa lutuk loin an chak thei tho.

Inter coach Simone Inzaghi chuan, "Lazio kha an inveng thiam em em a, player tin khan an tih tur chin an hriat avangin hmachhawn an harsa, kawi hmunah pawh khan an inveng thiam em em a ni.

"Match kan khelh tam thu kan sawi fo tawh a, tidanglam theitu erawh kan ni lo. Serie A leh Champions League kan ngaihtuah tel a ngaih avangin match zawng zawngah player ṭha inlan kim a rem lo," tiin a sawi.

Inter Milan hian Inrinni zanah Serie A match khel turin Napoli an lenchilh dawn - Antonio Conte naute hi Inter hnaih bertu an nih avangin inkhel pawimawh bik a ni dawn, chumi hnuah Feyenoord nen UCL an khel zui leh ang.